الماتى اۋەجايىندا شەتەلدەن كەلگەن بارلىق جولاۋشى تەكسەرۋدەن ءوتىپ جاتىر

None
None
الماتى. قازاقپارات - الماتى اۋەجايىندا باقىلاۋ كۇشەيتىلدى. ەلگە كەلگەن بارلىق جولاۋشىنى ارنايى مەديتسينالىق قۇرىلعىمەن تەكسەرىپ جاتىر، دەپ حابارلايدى قازاقپارات ءتىلشىسى.

الماتى قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ايمان جاقانبايەۆانىڭ ايتۋىنشا، اۋەجايدا زاماناۋي تەپلوۆيزورلار بار.

«بۇل قۇرىلعى ەكى جىل بۇرىن ورناتىلعان. تاۋلىك بويى جۇمىس ىستەيدى. ول دەنە قىزۋى جوعارى جولاۋشىلاردى بىردەن انىقتاپ ەسەپكە الادى. مۇنداي جاعدايدا قۇرىلعى اۆتوماتتى تۇردە تەپلوۆيزورعا بەلگى بەرەدى. ال ءبىز پلانشەت ارقىلى بىلەمىز »، - دەدى ايمان جاقانبايەۆا.

ول دەنە قىزۋى جوعارى جولاۋشىلاردى دەرەۋ ارنايى بولمەگە جىبەرەتىنىن اتاپ ءوتتى. وندا دارىگەرلەر ونى تولىقتاي تەكسەرىپ شىعادى، سودان كەيىن ناۋقاستى اۋرۋحاناعا جاتقىزۋ نەمەسە بوساتۋ تۋرالى شەشىم قابىلدانادى. وتكەن جىلى دەنە قىزۋى جوعارى 38 جولاۋشى انىقتالعان.

ساپا جانە باقىلاۋ دەپارتامەنتىنىڭ سانيتارلىق- كارانتيندى باقىلاۋ ءبولىمىنىڭ باستىعى رىسكۇل مەيىرمانوۆانىڭ ايتۋىنشا، قىتايداعى جاعدايعا بايلانىستى اۋەجاي كۇشەيتىلگەن رەجيمدە جۇمىس ىستەپ جاتىر.

«جىل باسىنان بەرى قىتايدان 7600 ادام ۇشىپ كەلدى. بىزدەن ولارعا 4 مىڭنان استام جولاۋشى ۇشىپ كەتتى. رەيستەر قىسقارتىلعان جوق. ءبارى جوسپارعا ساي ءجۇرىپ جاتىر. ءبىز تەك قىتايدان عانا ەمەس، سونىمەن قاتار باسقا ەلدەردەن ۇشىپ كەلگەن بارلىق جولاۋشىلارمەن الدىن الۋ شارالارىن جۇرگىزەمىز»، - دەپ تولىقتىردى رىسكۇل مەيىرمانوۆا.

ونىڭ ايتۋىنشا، تەمپەراتۋراسى كوتەرىلگەن ازاماتتار اۋەجايدا تىركەلگەن جوق. بۇگىنگى كۇنى جاعداي تۇراقتى.

اۆتور: الما مۇقانوۆا

سوڭعى جاڭالىقتار