مەملەكەت باسشىسى: ەلىمىزدىڭ قارجى جۇيەسى دەرتكە شالدىققان

None
None
نۇر- سۇلتان. قازاقپارات - قارجى ساياساتىنىڭ تيىمدىلىگىن ارتتىرۋ قاجەت. بۇل تۋرالى ۇكىمەتتىڭ كەڭەيتىلگەن وتىرىسىندا قازاقستان پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«سىزدەردىڭ نازارلارىڭىزدى الەۋمەتتىك- ەكونوميكالىق دامۋدىڭ كەلەسى وزەكتى ماسەلەلەرىنە اۋدارتقىم كەلەدى. قارجى ساياساتىنىڭ تيىمدىلىگىن ارتتىرۋ قاجەت. الاڭداتارلىق تەندەنسيالارعا نازار سالۋ كەرەك. ەكونوميكا دامۋىنداعى بانك سەكتورىنىڭ ءرولى جىلدان- جىلعا تومەندەپ بارادى. كورپوراتيۆتىك سەكتوردى نەسيەلەۋ 8,7 پايىزعا، شاعىن جانە ورتا بيزنەس 18 پايىزعا، اۋىل شارۋاشىلىعى 48 پايىزعا تومەندەدى» ، - دەدى مەملەكەت باسشىسى.

قازاقستان پرەزيدەنتىنىڭ ايتۋىنشا، حالىقتىڭ تۇتىنۋشىلىق نەسيە الۋى 24 پايىزعا ۇلعايىپ كەتكەن.

«بۇل رەتتە نەسيەلەردىڭ ۇشتەن ەكىسى جەكە تۇلعالارعا كەپىلسىز بەرىلگەن. ەلدىڭ قارجىلىق سەكتورىنداعى كۇردەلى پروبلەما ايقىن كورىنىپ تۇر. باسقاشا سوزبەن ايتساق، قارجى سەكتورى دەرتكە شالدىققان. وتكەن جىلى ومىرلىك قيىن جاعدايعا تاپ بولعان 500 مىڭ ازاماتتىڭ بەرەشەگى وتەلدى. 1,2 ميلليون ازاماتىمىزدىڭ تۇتىنۋشىلىق نەسيەلەرى بويىنشا ءوسىم پۇلدارى شىعىنعا جاتقىزىلدى» ، - دەدى قاسىم- جومارت توقايەۆ.

مەملەكەت باسشىسى ۇلتتىق بانك پەن قارجى نارىعىن رەتتەۋ اگەنتتىگى مۇنداي جاعدايدىڭ قايتالانباۋى ءۇشىن رەتتەۋشى شارالاردى قابىلداۋى ءتيىس ەكەندىگىن باسا ايتتى.

«ناقتى ايتار بولساق، نەسيە تولەي الاتىن ادامدارعا عانا بەرىلۋى ءتيىس. بىزدە جەكە تۇلعالاردىڭ تۇتىنۋشىلىق نەسيەلەرى 1,4 تىريلليون تەڭگەگە ۇلعايدى جانە 6,7 تىريلليون تەڭگەنى قۇرايدى. ولاردىڭ تولىق قايتارىلاتىنى كۇمان تۋدىرادى. ال زاڭدى تۇلعالاردىڭ نەسيەلەرى 590 ميلليارد تەڭگەگە تومەندەدى» ، - دەدى ق ر پرەزيدەنتى.


سوڭعى جاڭالىقتار