سوڭعى ونجىلدىقتا تۇسىرىلگەن ۇزدىك فيلمدەر تىزىمىنە «قازاق فيلمنىڭ» تۋىندىسى ەندى
«2014 -جىلى قازاقستان، گرۋزيا، گەرمانيا، فرانسيا جانە چەحيا ەلدەرىمەن بىرلەسىپ تۇسىرگەن رەجيسسەر گەورگي وۆاشۆيليدىڭ «جۇگەرى ارالى» كوركەم فيلمى الەمگە ايگىلى Variety كينوجۋرنالىندا سوڭعى ونجىلدىقتا ا ق ش- تا پروكاتقا شىقپاعان شەتەلدىڭ ۇزدىك فيلمدەردىڭ تىزىمىنە كىردى. قازاقستان تاراپىنان بۇل فيلمگە ش. ايمانوۆ اتىنداعى «قازاقفيلم» كينوستۋدياسى قولداۋ بىلدىرگەن، ال فيلمنىڭ باستاماشىل پروديۋسەرى - سايىن عابدۋللين» ، دەلىنگەن حابارلامادا.
باسىلىمدا جارىق كورگەن «كورسەتىلمەگەن ءىنجۋ» ماقالاسىنىڭ اۆتورى Variety جۋرنالىنىڭ باس كينوسىنشىسى پيتەر دەبريۋگ. ايتا كەتسەك، بەدەلدى سالالىق باسىلىمدا جاريالاناتىن اناليتيكالىق ماقالالار پروكاتپەن اينالىساتىن ماماندارعا جانە فەستيۆالدەر وكىلدەرىنە ۇلكەن ەكراندارعا شىعۋعا لايىقتى كارتينالاردى ىرىكتەۋگە كومەكتەسەدى.
«وسى كۇنگە دەيىن امەريكالىق كورەرمەندەر بۇل فيلمدەردى كورە الماعاندارىنا قاتتى وكىنەمىن. وسى تۋىندىلاردى تاۋىپ، مىندەتتى تۇردە كورۋگە كەڭەس بەرەمىن!» ، - دەپ جازادى كينوسىنشى.
اتالعان كارتينا نەمەرەسىمەن بىرگە جۇگەرى ءوسىرۋ ءۇشىن وزەن جاعاسىندا ورنالاسقان ارالعا ارنايى كوشىپ كەلگەن قاريا شارۋانىڭ ءومىرىن باياندايدى.
بۇل تۋىستىق جانە رۋحاني قاتىناستاردىڭ ادامگەرشىلىككە تولى جانە اسەرلى وقيعاسى. فيلمدە تىرشىلىكتىڭ قامى ءۇشىن ەڭبەك ەتىپ جۇرگەن قاراپايىم ادامداردىڭ ءومىرى سۋرەتتەلەدى. شارۋانىڭ ءرولىن تۇرىك اكتەرى ءىلياس سالمان، ال ونىڭ نەمەرەسىن - وسەتيالىق جاس اكتريسا ماريام بۋتۋريشۆيلي سومدادى.
« ءوزىنىڭ وسى تاماشا جۇمىسى ارقىلى بەس بىردەي ەلدىڭ بەدەلىن ارتتىرعان رەجيسسەردىڭ ەرەكشە تالانتى تۋرالى ايتقىم كەلەدى. مەن گەورگي وۆاشۆيليمەن 2004 -جىلى ماروككودا تانىستىم، كەيىن ونىڭ «باسقا جاعالاۋى» اتتى العاشقى تولىقمەتراجدى فيلمىندە پروديۋسەر بولدىم. بۇل تۋىندى بەرلين كينوفەستيۆالىنىڭ باعدارلاماسىنا ءىلىنىپ، 2009 -جىلى ەۋروپرالىق كينواكادەميانىڭ نوميناتسياسىنا ۇسىنىلعان بولاتىن. ۋاقىت وتە وسى «جۇگەرى ارالى» فيلمىنە كىرىستىك» ، - دەدى پروديۋسەر سايىن عابدۋللين.
ايتا كەتسەك، فيلمنىڭ تۇساۋكەسەرى 2014 -جىلى حالىقارالىق كارلوۆى ۆارى كينوفەستيۆالى اياسىندا ءوتتى. بۇل بايقاۋدا كينوتۋىندى باس جۇلدەگە جانە ەكۋمەنيكالىق قازىلار القاسىنىڭ ماراپاتىنا يە بولدى.
سول جىلى «جۇگەرى ارالى» فيلمى گرۋزيا ەلىنەن «شەتەلدىڭ ۇزدىك فيلمى» نوميناتسياسى بويىنشا «وسكار» جۇلدەسىنە ۇسىنىلىپ، ءتىپتى توعىز ۇمىتكەردەن تۇراتىن شورت- پاراقشاسىنا كىردى.
رەسەيدىڭ اناپا قالاسىندا وتكەن «كينوشوك» فەستيۆالىندە دە وۆاشۆيليدىڭ فيلمى باس جۇلدەگە جانە «ۇزدىك وپەراتورلىق جۇمىس» سىيلىعىنا يە بولدى. سونىمەن قاتار، بۇل تۋىندى مينسكىدە وتكەن «ليستوپاد» كينوفەستيۆالىندە «ۇزدىك وپەراتورلىق جۇمىس» جۇلدەسىمەن ماراپاتتالدى.
«جۇگەرى ارالى» فيلمى الەمگە ءماشھۇر كانن، بۋسان جانە سان- سەباستيان سىندى حالىقارالىق بەدەلدى كينوفەستيۆالدەردى قوسا ساناعاندا 70 كە جۋىق كينوبايقاۋلارعا قاتىستى. جالپى العاندا بۇل فيلم 32 جۇلدەگە يە بولدى، ولارلىڭ كەيبىرەۋلەرىن اتاپ كەتكەن ءجون:
«قازىلار القاسىنىڭ ارنايى جۇلدەسى» ، Film from the south/« وڭتۇستىكتىڭ فيلمدەرى» فەستيۆالىنىڭ نەگىزگى باعدارلاماسىنا قاتىسقان (وسلو، نورۆەگيا) ؛
«كينوسىنشىلار ماراپاتى» - Mostra de cinema/«كينوشوۋ» حالىقارالىق كينوفەستيۆالىنىڭ قۇرمەتتى جۇلدەسى، «جاڭا رەجيسسەرلەردىڭ جارىسى» كاتەگورياسىندا (سان- پاۋلۋ، برازيليا) ؛
«كورەرمەندەر كوزايىمى جۇلدەسى (ۇزدىك فيلم) » ، سونداي- اق «حالىقارالىق كينوسىنشىلاردىڭ جۇلدەسى» ، Athens panorama of European cinema/«ەۋروپالىق كينو پانوراماسى» فەستيۆالى (افينا، گرەكيا) ؛
«ۇزدىك رەجيسسەر» جانە «ۇزدىك اكتريسا» ، San marino international film festival/«حالىقارالىق سان- مارينوداعى كينوفەستيۆالدىك نەگىزگى باعدارلاماسىنا قاتىسقان (سان- مارينو) ؛
«ۇزدىك فيلم» ، «ۇزدىك مۋزىكا» ، «سىنشىلاردىڭ ماراپاتى» جانە گران- پري - «زولوتايا انتيگونا» جۇلدەسى، 36th International mediterranean film festival/«36-شى حالىقارالىق جەرورتالىق فيلمدەر كينوفەستيۆالى» (مونپەلە، فرانسيا) .