اۋىل شارۋاشىلىعىنداعى جەمقورلىقتىڭ الدىن الۋ جيىنى ءوتتى

نۇر- سۇلتان. قازاقپارات – ق ر اۋىل شارۋاشىلىعى مينيسترلىگىندە سالاداعى جەمقورلىقتىڭ الدىن الۋ جونىندەگى جيىن ءوتتى، دەپ حابارلايدى قازاقپارات ءتىلشىسى.

ەلىمىزدىڭ سىبايلاس جەمقورلىققا قارسى قىزمەتىمەن بىرگە ۇيىمداستىرىلعان شارا بارىسىندا اۋىل شارۋاشىلىعى ۆيتسە- ءمينيسترى گۇلميرا يسايەۆا ۆەدومستۆوعا قاراستى اگروونەركاسىپ كەشەنىندەگى مەملەكەتتىك ينسپەكتسيا كوميتەتىنىڭ مەملەكەتتىك ساتىپ الۋلارى بارىسىندا انىقتالعان زاڭ بۇزۋشىلىقتاردى جويۋ باعىتىندا اتقارىلعان جۇمىستارعا توقتالدى.

«ق ر اۋىل شارۋاشىلىعى مينيسترلىگى جەمقورلىق قۇقىق بۇزۋشىلىقتىڭ الدىن الۋ جۇمىستارىن ۇنەمى جۇرگىزىپ وتىرادى. ءبىز سىبايلاس جەمقورلىققا قارسى قىزمەتتىڭ جەمقورلىق زاڭ بۇزۋشىلىقتاردى ازايتۋ جانە جەمقورلىق قىلمىستار جاساۋعا تۇرتكى بولاتىن جايتتاردى جويۋ جونىندە شارالار قابىلداۋ بويىنشا بەرگەن بارلىق ۇسىنىستارىن ورىندادىق»، - دەدى ۆيتسە- مينيستر.

ونىڭ ايتۋىنشا، مەملەكەتتىك ساتىپ الۋ راسىمدەرىندە اسا قاۋىپتى زيانكەستەرگە قارسى وڭدەۋ كەزىندە قولدانىلاتىن ارنايى تەحنيكانىڭ قۇجاتتارىن مەملەكەتتىك تىركەۋ ەرەجەلەرىنە سايكەس ۇسىنۋ تالابى بەلگىلەندى. سونىمەن قاتار، تەحنيكا تۇرلەرى مەن وڭدەۋ ورىندارى ناقتىلاندى. مينيسترلىكتىڭ ىشكى ۇدەرىستەرىن باسقارۋ جونىندەگى نۇسقاۋلىققا، مەملەكەتتىك ساتىپ الۋ راسىمدەرىنە قاتىساتىن بارلىق بولىمشەلەر مەن مەملەكەتتىك قىزمەتشىلەردىڭ جەدەل ءوزارا ءىس- قيمىلىنا قاتىستى اگروونەركاسىپ كەشەنىندەگى مەملەكەتتىك ينسپەكتسيا كوميتەتى قىزمەتكەرلەرىنىڭ لاۋازىمدىق نۇسقاۋلىعىنا وزگەرىستەر ەنگىزىلدى.

فوتو: moa.gov.kz

اۆتور: مارلان جيەمباي