قىتاي بيلىگى ەل تۇرعىندارىن ۋحان قالاسىنا بارماۋعا كەڭەس بەردى

نۇر-سۇلتان. قازاقپارات –  قىتايدا تىركەلگەن كوروناۆيرۋستىڭ جاڭا ءتۇرى مۋتاتسياعا ۇشىراپ، ىندەتتىڭ ودان ءارى تارالۋ قاۋپى بار. بۇل تۋرالى قىتايدىڭ دەنساۋلىق ساقتاۋ جونىندەگى مەملەكەتتىك كوميتەتى ءتوراعاسىنىڭ ورىنباسارى لي بين مالىمدەدى.

وسىعان بايلانىستى ول ەل تۇرعىندارى مەن شەتەلدىكتەردى قىتايدىڭ جاڭا جىل مەرەكەسى كەزىندە ۋحان قالاسىنا بارۋدان باس تارتۋعا شاقىردى. سەبەبى ءدال وسى شاھار پنيەۆمونيانىڭ تارالۋ وشاعى ەكەنىن ەسكەرسەك، ميلليونداعان ادامنىڭ ساياحاتتاۋى جاعدايدى ورشىتە ءتۇسۋى مۇمكىن.

ەسكە سالا كەتەيىك، جۋىردا كوروناۆيرۋستىڭ جاڭا ءتۇرى ۋحان قالاسىنداعى بازاردا ساتىلعان جابايى جانۋارلاردان جۇققانى انىقتالدى. قازىر قالادا زارارسىزداندىرۋ جۇمىستارى ءجۇرىپ جاتىر.

لي بين، قىتايدىڭ دەنساۋلىق ساقتاۋ جونىندەگى مەملەكەتتىك كوميتەتى ءتوراعاسىنىڭ ورىنباسارى:

- سوڭعى ۋاقىتتا اتالعان ىندەتتى جۇقتىرعاندار سانى ارتىپ كەلەدى. اۋرۋ بەلگىلەرى جايلى كوبىرەك بىلە باستاعان سوڭ دياگنوستيكا ادىستەرى دە جەتىلدىرىلۋدە. تيىسىنشە دياگنوستيكالىق رەاگەنتتەر دە دەر كەزىندە بۇكىل ەل اۋماعىنا تاراتىلىپ جاتىر.

 ايتا كەتەيىك، بۇگىندە بۇل ىندەتتەن توعىز ادام كوز جۇمدى. ال ونى جۇقتىرعانداردىڭ سانى 440 ادامعا جەتكەن. قىتايدان بولەك اتالعان دەرتكە شالدىعۋ فاكتىلەرى ا ق ش، وڭتۇستىك كورەيا، جاپونيا، تايلاند پەن سينگاپۋر ەلدەرىندە دە تىركەلدى. سوڭعى مالىمەت بويىنشا گونكونگتا دا قاۋىپتى ۆيرۋستى جۇقتىرۋ دەرەگى انىقتالدى. وسىعان بايلانىستى ۇلت ساۋلىعىنا الاڭداعان الەم ەلدەرى اۋەجايدا جولاۋشىلار تەكسەرىسىن كۇشەيتىپ جاتىر.

www.24.kz