قىتايعا جول جۇرەتىن جاندارعا ارنالعان كەڭەستەر

نۇر- سۇلتان. قازاقپارات -  قىتايدا پنيەۆمونيانىڭ اسقىنۋىنا سەبەپ بولعان كوروناۆيرۋستىڭ تارالۋىنا بايلانىستى اقپارات كوپتەپ تاراۋدا.

ينتەرنەتتە شىنى دا، وتىرىگى دە جاريالانىپ جاتىر. بىراق ءقاۋىپ بارى جالعان ەمەس. بۇگىن ۋحان قالاسىندا ءوتۋى ءتيىس بولعان بوكستان وليمپيادانىڭ ىرىكتەۋ ءتۋرنيرى كەيىنگە شەگەرىلدى. سونداي- اق اۋرۋ شىققان بۇل قالادا بازارلار 1 - قاڭتاردان بەرى جابىلعان. ۆيرۋستىڭ قاۋپى مەن تارالۋى جايلى وسىعان دەيىن ءبىزدىڭ سايتتا ماقالا جاريالانعان. بۇگىن قىتايعا جول جۇرەتىن جاندارعا از- كەم كەڭەس جازۋدى ءجون ساناپ وتىرمىز. قازىرگى تاڭدا ماماندار كوروناۆيرۋستى تولىقتاي زەرتتەۋ ۇستىندە. ولار 2002 -جىلى بولعان ا ءتيپتى پنيەۆمونيادان قاۋىپتى ەمەس دەپ سانايدى. ول كەزدە بۇل اۋرۋدان 774 ادام كوز جۇمعان ەدى. اۋرۋدىڭ قالاي تارالاتىنى دا قازىر تولىق انىقتالماعان. ۋحاندا پوليسيا ماماندارى جالعان اقپارات تاراتقانداردى جازالاۋدى باستاعان. ال دۇنيەجۇزىلىك دەنساۋلىق ساقتاۋ ۇيىمى قىتاي بيلىگىمەن بىرلەسە وتىرىپ جاعدايدى باقىلاۋدا ۇستاۋدا.

 ۆيرۋستىڭ باستى بەلگىلەرى قانداي؟

- دەنە تەمپەراتۋراسى 39 °س- قا دەيىن كوتەرىلۋى؛

 - تەرى بوزارۋى؛

- كوكىرەكتى قىرناپ شىعاتىن قۇرعاق جوتەل؛

 - تەرشەڭ بولۋ؛

 - بىردەن السىرەۋ؛

ۆيرۋستىڭ شىعۋىنا بايلانىستى قىتايعا بارعاندا ساق بولۋ كەرەك. ەگەر شۇعىل شارۋا بولماسا، كەيىنگە قالدىرعان دا ءجون. ءوزىڭىز دە، ءسىزدى ويلايتىن جاندار دا الاڭدامايتىن بولادى. ەگەر اسپان استى ەلىنە جول ءتۇسىپ تۇرسا كەي قاراپايىم گيگيەنالىق ەرەجەلەردى ەستەن شىعارماۋ كەرەك. قولدى جۋىپ ءجۇرۋ، ماسكا كيىپ ءجۇرۋ، ەت پەن جۇمىرتقانى تولىق ءپىسىرۋ جانە جوتەلىپ، بولماسا تۇشكىرگەن ادامداردان الىستاۋ ءجۇرۋدى ەستە ۇستاڭىز. سونداي- اق قوعامدىق دەنساۋلىق ساقتاۋ ورتالىعى دايارلاعان ينفوگرافيكانى نازارلارىڭىزعا ۇسىنامىز.

Massaget.kz