قىتايدا تاراعان قاۋىپتى ۆيرۋس: قىرعىزستان ۇرىمجىدەن ۇشىپ كەلگەندەردى تەكسەرە باستادى
«ماناس» اۋەجايىندا دەنساۋلىق ساقتاۋ مينيسترلىگىنە قاراستى سانيتارلىق-كارانتين پۋنكت قىزمەتكەرلەرى ۇرىمجىدەن ۇشىپ كەلگەندەردى تەكسەرىپ جاتىر. مەكەمەنىڭ باسپا ءسوز حاتشىسى اليا كۋربانوۆانىڭ ازاتتىققا ايتۋىنشا، ءۇرىمجى-بىشكەك باعىتى بويىنشا رەيستەر كۇن سايىن ۇشادى. جولاۋشىلاردى قىتايلىق اۋە كومپانياسى تاسيدى.
قىتايدا جاڭا جىل مەيرامىنىڭ تويلانۋىنا بايلانىستى 23- قاڭتار مەن 1- اقپان ارالىعىندا ەكى قالا اراسىنداعى رەيستەر ۋاقىتشا توقتايدى.
21-قاڭتاردا قىتايدىڭ دەنساۋلىق ساقتاۋ جونىندەگى ۇلتتىق كوميسسياسى 13 پروۆينتسيادا 440 ادامنىڭ جاڭا ۆيرۋستى جۇقتىرعانىن، 9 ادامنىڭ كوز جۇمعانىن حابارلادى. ۆيرۋستىڭ ادامنان ادامعا تىنىس الۋ جولدارى ارقىلى تاراۋ مۇمكىن ەكەنى دە ايتىلدى.
كوميسسيا ءتوراعاسىنىڭ ورىنباسارى لي بين 22- قاڭتاردا جۋرناليستەرگە ۋحان قالاسىندا جانۋارلاردى تاسىمالداۋعا تىيىم سالىنعانىن حابارلادى. ءدال وسى قالادان ۆيرۋس تاراعان.
وسى اپتادا ا ق ش- تا ءبىر ادامنىڭ بەلگىسىز ۆيرۋستى جۇقتىرعانى انىقتالدى. بۇل – ا ق ش- تا تىركەلگەن ءبىرىنشى وقيعا. ۆاشينگتون شتاتىنىڭ تۇرعىنى 15- قاڭتاردا ۋحان قالاسىنان سيەتلگە ۇشىپ كەلگەن. 30 جاستان اسقان ەر ادام 19- قاڭتاردا دارىگەرلەرگە كورىنگەن. ونىڭ جاعدايى تۇراقتى. وزگە ناۋقاستاردان بولەك جەردە ەمدەلىپ جاتىر.
ۆيرۋستىڭ قانداي جولمەن جۇعاتىنى ازىرگە انىقتالماعان. ساراپشىلاردىڭ سوزىنشە، ۆيرۋس ادامعا جانۋارلاردان جۇعۋى مۇمكىن، ادامنان ادامعا جۇعۋ مۇمكىندىگى دە جوققا شىعارىلمايدى. 19- قاڭتارعا دەيىن ۋحان قالاسىندا 198 ادام اۋىرىپ، ءۇش ادام ولگەن. تايلاندتا ءبىر، جاپونيادا ءبىر ادامنىڭ ۆيرۋس جۇقتىرعانى جايلى اقپارات تارادى.
ادەتتە كورونوۆيرۋس پنيەۆمونيانى قوزدىرادى. اۋرۋدى جەڭىلدەتەتىن ادىستەر بولعانمەن ۆيرۋستىڭ كوزىن جوياتىن امال تابىلعان جوق. بۇعان دەيىن بۇل دەرتكە شالدىققان ونداعان ادام اۋرۋدان ايىعىپ، اۋرۋحانادان شىققان.
22- قاڭتاردا دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ تارالۋ ماسەلەسىن تالقىلايدى.