ەلىمىزدەگى ەڭ «اقىلدى» قالالار انىقتالدى

None
None
نۇر-سۇلتان. قازاقپارات - قازاقستاندا «اقىلدى» وڭىرلەردىڭ رەيتينگى جاسالدى. بۇل تۋرالى قازاقپارات ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە سىلتەمە جاساپ حابارلايدى.

زەرتتەۋگە 14 وبلىس ورتالىعى مەن رەسپۋبليكالىق ماڭىزى بار 3 قالا قاتىستى. باعالاۋ 11 ءتۇرلى باعىت پەن 80 كورسەتكىشتەن تۇراتىن «اقىلدى قالالار» ەتالوندىق ستاندارتى نەگىزىندە جۇرگىزىلدى. ولار دەنساۋلىق ساقتاۋ، ءبىلىم بەرۋ، تۇرعىن ءۇي-كوممۋنالدىق شارۋاشىلىعى، كولىك، ەكولوگيا، الەۋمەتتىك جانە ت. ب. سالالاردى سيفرلاندىرۋ باستامالارىنا قاتىستى.

ق ر سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆتىڭ ايتۋىنشا، رەيتينگ وڭىرلەردى «سيفرلىق» بەلسەندىلىكتى ارتتىرۋعا ىنتالاندىرۋ ءۇشىن قاجەت.

اتاپ ايتقاندا، رەيتينگتى قۇرۋ كەزىندە اكىمدىكتەردىڭ مەملەكەتتىك قىزمەتتەردى اۆتوماتتاندىرۋى، تۇرعىن ۇيلەرگە «اقىلدى» ەسەپتەۋىش قۇرالدارىنىڭ ورناتىلۋى، تىركەلگەن ستارتاپتاردىڭ سانى، زياتكەرلىك كولىك جۇيەسىنىڭ ەنگىزىلۋى، قوعامدىق كولىكتىڭ باعىت-باعدارىن مونيتورينگتەۋ جانە ت. ب. ارنالعان قوسىمشالاردىڭ قولجەتىمدىلىگى نازارعا الىندى.

ۆيتسە-ءمينيستردىڭ اتاپ وتۋىنشە، بۇل رەيتينگ وڭىرلەردىڭ «سيفرلىق» بەلسەندىلىگىن ارتتىرۋعا باعىتتالعان.

«سيفرلىق قازاقستان» مەملەكەتتىك باعدارلاماسى ەكى جىل بۇرىن قابىلدانىپ، وڭىرلەردە ءبىرقاتار جوبا جۇزەگە اسىرىلدى. ارينە، ولاردىڭ كەيبىرى ءتيىمدى بولسا، كەيبىرىنىڭ ناتيجەسى تومەن بولدى. سيفرلاندىرۋ سالاسىنداعى جالپى جاعدايدى كورسەتۋ ءۇشىن ءبىز وسى رەيتينگتى ازىرلەدىك. بۇل سونداي-اق وڭىرلەردىڭ «سيفرلىق» دامۋىن ىنتالاندىرۋ ءۇشىن قاجەت»، - دەپ اتاپ ءوتتى ا. وسپانوۆ.

رەيتينگتە ءبىرىنشى ورىنعا نۇر-سۇلتان قالاسى يە بولسا، ەكىنشى ورىندى الماتى، ءۇشىنشى ورىندى ورال قالاسى يەلەندى.

رەيتينگ جىل سايىن قۇرىلادى. 2019-جىلعى رەيتينگتىڭ ناتيجەسىمەن https://egov.kz/cms/ru/smart-cities سىلتەمەسى ارقىلى تانىسا الاسىزدار.

سوڭعى جاڭالىقتار