قازاقستاندا تىڭ تەحنولوگيالار سالاسىنداعى جوبالاردى ىسكە اسىرۋعا جاعداي جاسالادى

نۇر-سۇلتان. قازاقپارات – ق ر پارلامەنتى ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سيفرلىق تەحنولوگيالاردى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسىن جۇمىسقا الدى، دەپ حابارلايدى قازاقپارات ءتىلشىسى.

«اتالعان زاڭ جوباسى مەملەكەت باسشىسىنىڭ 2019-جىلعى 2- قىركۇيەكتەگى «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ىسكە اسىرۋ ماقساتىندا ازىرلەندى. زاڭ جوباسى سيفرلىق تەحنولوگيالاردى ەنگىزۋگە جانە دامىتۋعا، سونداي-اق سيفرلىق تەحنولوگيالاردى، بلوكچەيندى، «ۇلكەن دەرەكتەردى»، سيفرلىق اكتيۆتەردى جانە باسقالاردى قولدانۋمەن بايلانىستى قوعامدىق قاتىناستاردى رەتتەۋگە، اقپاراتتىق-كوممۋنيكاتسيالىق تەحنولوگيالار سالاسىنداعى جوبالاردى ىسكە اسىرۋ كەزىندە جاعداي جاساۋعا باعىتتالعان»، - دەدى ءماجىلىس دەپۋتاتى نۇرتاي سابيليانوۆ.

ونىڭ سوزىنە قاراعاندا، زاڭ جوباسى 38 زاڭنامالىق اكتىگە، ونىڭ ىشىندە 8 كودەكسكە جانە 30 زاڭعا وزگەرىستەر مەن تولىقتىرۋلار ەنگىزۋدى كوزدەيدى.

«كوميتەت وسى زاڭ زوباسىن جۇمىسقا الۋعا جانە ول بويىنشا 2021-جىلدىڭ 17- اقپانىنا دەيىن قورىتىندى ازىرلەۋگە دايىن»، - دەدى دەپۋتات.

ەسكە سالا كەتەيىك، پرەزيدەنت قاسىم-جومارت توقايەۆتىڭ قازاقستان حالقىنا جولداۋىندا سيفرلىق ەكونوميكانى دامىتۋدا اۋقىمدى جۇمىستار اتقارۋدى تاپسىردى.

«ءبىزدىڭ مىندەتىمىز - اقپاراتتىق كوممۋنيكاتسيالىق ينفراقۇرىلىمنىڭ دامۋ دەڭگەيى بويىنشا وڭىردەگى كوشباسشىلىقتى نىعايتۋ. ۇكىمەت زاڭنامانى 5G، «اقىلدى قالالار»، «ۇلكەن دەرەكتەر»، بلوكچەين، سيفرلىق اكتيۆتەر، جاڭاتسيفرلىق قارجى قۇرالدارى سياقتى تىڭ تەحنولوگيالىق قۇبىلىستارعا بەيىمدەۋ قاجەت. قازاقستان تەحنولوگيالىق سەرىكتەستىك ورناتۋ، مالىمەت ورتالىقتارىن قۇرۋ جانە ورنالاستىرۋ، مالىمەتتەر ءترانزيتىن دامىتۋ، سيفرلىق قىزمەتتەردىڭ جاھاندىق نارىعىنا قاتىسۋ ءۇشىن اشىق يۋريسديكتسيا رەتىندە وزىندىك برەندكە اينالۋى ءتيىس»، - دەدى مەملەكەت باسشىسى.