يرانداعى ۋكراينا ۇشاعى ەكى زىمىرانمەن اتقىلانعان - تەرگەۋ

None
None
تەگەران. قازاقپارات - وسى جىلدىڭ 8- قاڭتارىندا تەگەراننان ۋكرايناعا ۇشىپ بارا جاتىپ، اپاتقا ۇشىراعان جولاۋشىلار ۇشاعىن جاقىن راديۋستان «جەر-اۋا» كلاسىنىڭ ەكى زىمىرانى اتىپ قۇلاتقان، دەلىنگەن يران ازاماتتىق اۆياتسيا ۇيىمىنىڭ تەرگەۋى تۋرالى ەكىنشى ەسەبىندە.

بۇل تۋرالى قازاقپارات Bloomberg-كە سىلتەمە جاساپ حابارلايدى.

ەسەپكە سايكەس، Tor- M1 زىمىراندارى سولتۇستىك باعىتتان Boeing 737-800 تاراپىنا قاراي جىبەرىلگەن.

ەسەپتە ۇشاقتىڭ تەگەراننان 6:12 دە ۇشىپ، 8100 فۋت (2,47 شاقىرىم) بيىكتىكتە اۋە ديسپەتچەرىمەن بايلانىستى جوعالتقانى ايتىلعان. ول 06:15 تە ەكىنشى باقىلاۋ رادارىنىڭ ەكرانىنان، 06:18 ءبىرىنشى باقىلاۋ رادارىنان كورىنبەي قالعان. ۇشاق تۇرعىن ءۇي اۋدانىنان ۇشىپ ءوتىپ، قوعامدىق ساياباق اۋماعىندا جەرگە قۇلاعانى انىقتالدى.

بۇدان بولەك، ۇشاقتىڭ قارا جاشىگى مەن بورتتىڭ وزدىگىنەن جازۋ قۇرالى «الەمدەگى ەڭ جەتەكشى قۇرىلعىلاردىڭ ءبىرى»، ال يراندا ونىڭ ماعىناسىن اشاتىن اپپاراتۋرا جوق. فرانسۋزدار مەن امەريكالىق اگەنتتىكتەر يرانعا قاجەتتى قۇرال-جابدىقتار بەرۋدەن باس تارتقان.

ەسكە سالايىق، سارسەنبى، 8- قاڭتاردا تەگەران ۋاقىتىمەن 6:00 دە يمام حومەيني اتىنداعى اۋەجايدان تەگەران- كيەۆ باعىتىمەن ۇشقان «ۋكراينا حالىقارالىق اۋە جەلىلەرى» اۋە كومپانياسىنىڭ Boeing-737 ۇشاعى اپاتقا ۇشىراعان ەدى.

ۇشاق بورتىندا 177 ادام بولعان: 168 جولاۋشى مەن 9 ەكيپاج مۇشەسى. ونىڭ ىشىندە يراننىڭ – 82، كانادانىڭ – 63، ۋكراينانىڭ - 2 + 9 (ەكيپاج)، شۆەتسيانىڭ – 10، اۋعانستاننىڭ – 4، گ ف ر- دىڭ – 3، ۇلى بريتانيانىڭ 3 ازاماتى بولعان. ولاردىڭ بارلىعى قازا تاپتى.

سوڭعى جاڭالىقتار