قازاقستاندىق سيىر ەتىنىڭ العاشقى پارتياسى بەيجىڭ نارىعىنا شىقتى
113 گەكتار اۋماقتى الىپ جاتقان «سينفادي» كوتەرمە بازارى قىتاي استاناسى تۇرعىندارى تۇتىناتىن اۋىل شارۋاشىلىعى ونىمدەرىنىڭ 90 پايىزىن قامتاماسىز ەتەدى. 2019-جىلى اتالعان بازاردىڭ ساۋدا كەلىسىمدەرىنىڭ كولەمى 19 ميلليارد دوللاردى قۇرادى.
«سينفادي» بازارىنىڭ اكىمشىلىگى قازاقستاندىق سيىر ەتىنىڭ يمپورتىن جىلىنا 5 مىڭ تونناعا جەتكىزۋدى جوسپارلاپ وتىر.
ايتا كەتەتىن ماسەلە، قىتايدىڭ شەتەلدەن ساتىپ الاتىن ەتىنىڭ كولەمى باسقا ازىق-تۇلىك تاۋارلارىنىڭ كولەمىمەن سالىستىرعاندا ەڭ كوبى بولىپ وتىر.
قىتايدىڭ باس كەدەن باسقارماسىنىڭ مالىمەتتەرى بويىنشا، تەك 2019-جىلدىڭ وزىندە سيىر ەتىنىڭ يمپورتى %60 ءوسىپ، 1,66 ميلليون توننانى قۇراعان.
سوعان قاراماستان الەمدىك نارىقتا باسەكەلەستىك وسە تۇسۋدە. ەت ءوندىرۋ كولەمىن ەندى ا ق ش پەن لاتىن امەريكاسى دا (ارگەنتينا، پاراگۆاي جانە ت. ب. ) ۇدەتە تۇسپەك.