ومبىدا «قازاق حاندىعى. الماس قىلىش» فيلمى كورسەتىلەدى
«2020-جىلدىڭ 21- قاڭتار كۇنى ومبى قالاسىنىڭ «ۆاۆيلون» كينو ورتالىعىندا رەسەيدەگى قازاقستان كينوسى فەستيۆالى اياسىندا ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق تۇسىرگەن «قازاق حاندىعى. الماس قىلىش» فيلمى كورسەتىلەدى. كينوتۋىندىنىڭ كورسەتىلىمىنە ومبى قالاسىنداعى ق ر باس كونسۋلى جانە باسقا دا قۇرمەتتى قوناقتار شاقىرىلعان» دەلىنگەن اقپاراتتا.
تاريحي فيلم كورەرمەنگە قازاق تىلىندە (تيتر - ورىس تىلىندە) كورسەتىلەدى.
ايتا كەتسەك، اتالعان تۋىندىڭ رەجيسسەرى - قازاقستاننىڭ ەڭبەك سىڭىرگەن قايراتكەرى، كينورەجيسسەر، سەناريست ءارى سۋرەتشى رۇستەم ابدىراشيەۆ.
بۇل اۋقىمدى تاريحي فيلم - ءىلياس ەسەنبەرليننىڭ «الماس قىلىش» رومانىنىڭ نەگىزىندە جازىلعان «قازاق حاندىعى» كينوديولوگياسىنىڭ ءبىرىنشى ءبولىمى.
فيلمدە XV عاسىردا قازاق حاندىعىنىڭ قۇرىلۋى جانە جانىبەك پەن كەرەي سۇلتانداردىڭ تاريحي ءرولى تۋرالى باياندالادى.
«قازاق حاندىعى» جوباسىنىڭ يدەيا اۆتورى – ق ر تۇڭعىش پرەزيدەنتى - ەلباسى نۇرسۇلتان نازاربايەۆ.