ەشكىمگە ايتۋعا بولمايتىن جەتى قۇپيانى بىلەسىز بە؟

نۇر-سۇلتان. قازاقپارات - عالىمدار ادام بالاسى جەتىستىككە جەتۋ ءۇشىن، ءوز وتباسىنىڭ ىنتىماعىن ساقتاۋ ءۇشىن، كەيبىر مالىمەتتەردى ايتپاۋ كەرەك دەگەن پىكىردە.

وسى ورايدا Muslim.kz سايتى ەشكىمگە ءتىس جارۋعا بولمايتىن جەتى قۇپيا تۋرالى جازادى.

1. كەلەشەككە قۇرعان جوسپار

جوسپار تولىققاندى ورىندالمايىنشا ول تۋرالى ايتپاعان ءجون. ادامنىڭ ويى باستاپقىدا ءالجۋاز بولادى.

2. قايىرىمدى ىستەر تۋرالى ەشكىمگە ايتپاۋ

قايىرىمدى ءىس - جەر بەتىندە سيرەك كەزدەسەتىن قۇبىلىس، سول سەبەپتى ونى كوزدىڭ قاراشىعىنداي ساقتاۋ كەرەك. ءوزىڭىزدى جاقسىلىق جاساعانىڭىز ءۇشىن اسىرا ماقتاماڭىز. ماقتاۋ ادامدى تاكاپپارلىققا جەتەلەيدى.

3. يماندى ەكەنىڭىز تۋرالى كوپشىلىكتە ايتپاۋ

تاماق، ۇيقى، كۇلكى، توسەك قاتىناسىنا بايلانىستى شەكتەۋلەرىڭىزدى ەشكىمنىڭ بىلمەگەنى ءجون. ءتاننىڭ شەكتەۋى كوڭىلدىڭ تاقۋالىعىمەن ۇيلەسسە عانا پايدالى.

4. جاساعان ەرلىك، باتىرلىق تۋرالى ۇندەمەۋ

ءار ادام كۇن سايىن ءتۇرلى وقيعالاردى باستان وتكەرەدى. بىرەۋ بىلەكتىڭ كۇشىمەن جەڭىپ جاتسا، بىرەۋدىڭ اقىلى اسىپ-تۇسەدى. كۇشپەن جەڭگەن ادامنىڭ ەرلىگى تەزىرەك باعالاناتىنى راس. ال ىشكى ارپالىستى بارلىعى بايقاي بەرمەۋى ىقتيمال. سوندىقتان ول ءۇشىن ەشكىم ماراپات بەرمەيدى.

5. رۋحاني جەتىلۋ تۋرالى ايتپاۋ

رۋحاني قۇندىلىق تەك سىزدىكى. ونى بىرەۋگە ايتىپ ابىروي جيناي المايسىز. اينالاڭىزداعى ادامداردىڭ شىن مۇقتاجدىعىن كورسەڭىز عانا شەت جاعاسىن ايتىڭىز.

6. ۇيدەگى ۇرىس-كەرىس پەن وتباسىلىق ءومىر تۋرالى ۇندەمەۋ

وتباسىڭىزداعى ۇرىس تۋرالى نەعۇرلىم از ايتساڭىز، ونىڭ ىنتىماعى بەرىك بولا تۇسەدى. بۇل ەسىڭىزدە بولۋى كەرەك. ۇرىس - ارالاسۋ بارىسىندا جينالىپ قالعان زياندى قۋات.

7. باياعىدا ەستىگەن جامان سوزدەر تۋرالى ايتا بەرمەۋ

كوشەدە ءجۇرىپ اياق كيىمدى بىلعاپ الۋعا بولادى. ال كەيدە سانانى دا بىلعاپ الاتىندار تابىلادى. جولدا كەلە جاتىپ ەستىگەن بار قاڭسىق ءسوزدى ۇيگە كەلىپ ايتقان ادامنىڭ تابالدىرىقتان اتتاپ، بىلعانىش اياق كيىممەن تورگە شىققان جاننان ەشقانداي ايىرماشىلىعى جوق.