ديماش توكيوداعى دجاز فەستيۆالىندە ونەر كورسەتەدى
19-شى Tokyo Jazz Festival مامىردىڭ 22-24 كۇندەرى جاپونيا استاناسىندا وتەدى. بۇل باستاۋىن 2002-جىلدان الاتىن كۇنشىعىس ەلىندەگى ءىرى مۋزىكالىق فەستيۆالدەردىڭ ءبىرى سانالادى. ول دجازدىڭ شىن مانىندەگى تانىمال ارتىستەرىن شاقىرۋىمەن بەلگىلى.
مۋزىكالىق فەستيۆالدىڭ ۇيىمداستىرۋشىلارى بيىل مادەني شاراعا 90 مىڭنان استام كورەرمەن جينالاتىندىعىن كۇتىپ وتىر. بۇعان قازاقستاننان باراتىن قوناقتىڭ دا ۇلەسى زور بولۋى ىقتيال. سەبەبى Tokyo Jazz Festival- ءدىڭ Facebook پاراقشاسىندا جاريالانعان اڭداتپاسىنا پىكىر قالدىرعانداردىڭ باسىم بولىگى ديماشتىڭ اتالعان شاراعا قاتىساتىندىعىن قۋانا جازىپ جاتىر.
«تاڭعاجايىپ توكيودا ديماشتىڭ قاتىسۋىمەن وتەتىن دجاز فەستيۆال تاماشا بولارى ءسوزسىز»، «توكيودا ديماشتى كورگەنشە اسىقپىن»، «مەن ءۇشىن ديماشتىڭ قانداي ءان ورىندايتىندىعى قىزىقتى. ول كلاسسيكالىق جانە پوپ-مۋزىكامەن قاتار دجاز ۆوكالدا دا تاڭعاجايىپ ءانشى»، دەپ ءانشىنىڭ الەمنىڭ ءار قيىرىنداعى جانكۇيەرلەرى جازبا قالدىرعان.