يراندا اۋە اپاتىنان قازا تاپقانداردىڭ مۇردەسى ۋكرايناعا جەتكىزىلدى

نۇر-سۇلتان. قازاقپارات - «بوريسپول» حالىقارالىق اۋەجايىندا يرانداعى اۋە اپاتىنان قازا تاپقان «ماۋ» اۋە كومپانياسى ۇشاعىنىڭ ەكيپاج مۇشەلەرى مەن ۋكرايندىق جولاۋشىلاردى ازا تۇتۋعا ارنالعان شارا باستالدى، دەپ حابارلايدى قازاقپارات ءتىلشىسى.

ۋكرينفورم اگەنتتىگىنىڭ حابارلاۋىنشا، اۋەجايعا قازا تاپقانداردىڭ تۋىستارى جينالعان. سونىمەن قاتار گۇل الىپ كەلگەن ادامداردىڭ قاراسى دا قالىڭ. اۋەجايدا مەديتسينالىق قىزمەتتەردىڭ، مەملەكەتتىك توتەنشە جاعدايلار قىزمەتىنىڭ وكىلدەرى، ۇلتتىق گۆارديا جاۋىنگەرلەرى، ۇلتتىق پوليتسيا قىزمەتكەرلەرى ءجۇر. ازا تۇتۋ شاراسىنا قاتىستى اقپارات تاراتۋ ءۇشىن كەلگەن جۋرناليستەردىڭ لەگى دە مول.

مۇردەلەردى الىپ كەلگەن ۇشاق اۋەجايعا جەرگىلىكتى ۋاقىت بويىنشا ساعات 11 دە قونعان. قازا تاپقانداردى ازا تۇتۋعا ارنالعان شارا «بوريسپول» حالىقارالىق اۋەجايىنىڭ ۆ تەرمينالىندا ساعات 12 دەن باستالماق.

جالپى، اۋەجاي شتاتتىق رەجىمدە جۇمىس ىستەپ تۇر. وزگە تەرمينالداردان ۇشاقتاردىڭ ۇشىپ كەلۋى مەن ۇشۋى كەستەگە سايكەس جۇرگىزىلىپ جاتىر. جولاۋشىلارعا ساعات 12 مەن 13 ارالىعىندا «بوريسپول» اۋەجايى باعىتىنداعى جولدا قوزعالىسقا شەكتەۋ بولاتىندىعى ەسكەرتىلگەن.

ەسكە سالايىق، سارسەنبى، 8- قاڭتاردا تەگەران ۋاقىتىمەن 6:00 دە يمام حومەيني اتىنداعى اۋەجايدان تەگەران-كيەۆ باعىتىمەن ۇشقان «ۋكراينا حالىقارالىق اۋە جەلىلەرى» اۋە كومپانياسىنىڭ Boeing-737 ۇشاعى اپاتقا ۇشىرادى. ۇشاق بورتىندا 177 ادام بولعان: 168 جولاۋشى مەن 9 ەكيپاج مۇشەسى. ونىڭ ىشىندە يراننىڭ – 82، كانادانىڭ – 63، ۋكراينانىڭ - 2 + 9 (ەكيپاج)، شۆەتسيانىڭ – 10، اۋعانستاننىڭ – 4، گ ف ر- دىڭ – 3، ۇلى بريتانيانىڭ 3 ازاماتى بولدى. ولاردىڭ بارلىعى قازا تاپتى.

«ۋكراينانىڭ حالىقارالىق اۋە جەلىلەرى» ۇشاعىنىڭ اپاتقا ۇشىراۋىنا بايلانىستى جاۋاپكەرشىلىكتى يراننىڭ اسكەري-ساياسي قۇرىلىمى «يسلام ريەۆوليۋتسيالىق ۇلاندار كورپۋسى» ءوز موينىنا الدى.