ليۆيا ماسەلەسىنە قاتىسۋشى ەلدەر كەلىسىمگە كەلدى
بەرليندەگى جيىنعا ب ۇ ۇ باس حاتشىسى انتونيۋ گۋتەرريش، گەرمانيا كانتسلەرى انگەلا مەركەل، رەسەي پرەزيدەنتى ۆلاديمير پۋتين، تۇركيا مەن فرانسيانىڭ مەملەكەت باسشىلارى رەدجەپ تايىپ ەردوعان مەن ەممانۋەل ماكرون، سونىمەن قاتار ۇلى بريتانيا پرەمەر-ءمينيسترى بوريس دجونسون قاتىستى.
قاتىسۋشىلار ءتورت ساعاتقا سوزىلعان كەڭەس سوڭىندا قارۋ جەتكىزۋدى توقتاتىپ، بيلىككە تالاسىپ جاتقان ەكى تاراپتى تاتۋلاستىرۋ شارالارىن قولعا الۋعا كەلىستى.
قۇجاتقا 12 ەلدىڭ وكىلدەرى، سونىمەن قاتار بىرىككەن ۇلتتار ۇيىمى، ەۋروپالىق وداق، افريكالىق وداق جانە اراب مەملەكەتتەرى ليگاسى وكىلدەرى قول قويدى.
«ءبارىمىز قارۋ جەتكىزۋ ەمبارگو تالاپتارىنا جاۋاپكەرشىلىكپەن قاراپ، ونى بىلتىرعىدان دا قاتتى باقىلاۋعا الۋىمىز كەرەك»، - دەدى گەرمانيا كانتسلەرى انگەلا مەركەل.
ايتا كەتسەك، ليۆيادا 2011-جىلدان بەرى ازاماتتىق سوعىس ءجۇرىپ جاتىر. ليۆيا ۇلتتىق اسكەرى ەلدىڭ شىعىسىنداعى ۇلكەن اۋماقتى باقىلاۋدا ۇستايدى. وتكەن جىلدىڭ ءساۋىر ايىندا ولار تريپوليدەگى ۇلتتىق كەلىسىم ۇكىمەتىن قولدايتىن كۇشكە قارسى ءىس-قيمىلدى باستادى.