نۇر-سۇلتانداعى «بۇكىر» كوپىردە كولىك قوزعالىسىنا شەكتەۋ قويىلدى

نۇر-سۇلتان. قازاقپارات - باس قالاداعى بوگەنباي باتىر داڭعىلىنىڭ بويىنداعى كوپىردە جول قوزعالىسىنىڭ سىزباسى وزگەردى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنە سىلتەمە جاساپ.

«بوگەنباي باتىر داڭعىلىنىڭ بويىنداعى كوپىردە جول قوزعالىسىنىڭ شەكتەلۋىنە بايلانىستى، بوگەنباي باتىر داڭعىلى - ءۋاليحانوۆ كوشەسىنىڭ قيىلىسىندا جانە بوگەنباي باتىر داڭعىلى - ايمانوۆ كوشەسىنىڭ قيىلىسىندا سول جاق بۇرىلىس پەن كەرى بۇرىلۋعا ۋاقىتشا تىيىم سالىندى (كوپىردەن ءتۇسۋ باعىتىندا).

وسىعان وراي، بوگەنباي باتىر داڭعىلى ارقىلى ايمانوۆ كوشەسىنە وڭعا بۇرىلىپ، دۇكەن ۇلى كوشەسىنە وڭعا قاراي جانە ءۋاليحانوۆ كوشەسىنە شىعۋ باعىتتارىنداعى مارشرۋتتاردى قولدانۋدى ۇسىنامىز» دەلىنگەن دەپارتامەنت تاراتقان حابارلامادا.

سونداي-اق، اتالعان مەكەمە كولىك جۇرگىزۋشىلەرگە ىڭعايلى بولۋى ءۇشىن باعدارشامداردىڭ جۇمىس رەجيمىنە دە ءتيىستى وزگەرىس ەنگىزىلگەنىن حابارلايدى.