پرەزيدەنت كەڭەسشىسى ۇلتتىق كەڭەس مۇشەلەرىمەن كەزدەستى

نۇر-سۇلتان. قازاقپارات – ق ر پرەزيدەنتىنىڭ كەڭەسشىسى ەرلان قارين ۇلتتىق قوعامدىق سەنىم كەڭەسىنىڭ ءبىرقاتار مۇشەسىمەن كەزدەستى، دەپ حابارلايدى قازاقپارات ءتىلشىسى.

«ۇلتتىق كەڭەستىڭ ءبىرقاتار مۇشەسىمەن كەزدەسىپ، پرەزيدەنتتىڭ جۋىردا جاريالاعان جاڭا باستامالارى قالاي جۇزەگە اسىرىلاتىندىعى تۋرالى اقپارات بەردىم. ۇلتتىق كەڭەستىڭ جەلتوقسان ايىندا وتكەن ەكىنشى وتىرىسى بويىنشا پرەزيدەنت اكىمشىلىگىنىڭ جەتەكشىسى ەرلان جاقان ۇلى قوشانوۆتىڭ قولىمەن ارنايى جوسپار بەكىتىلدى. ول جوسپارعا سايكەس ءتيىستى مەملەكەتتىك قۇرىلىمدار جۋىق ارادا ءار باستاما بويىنشا زاڭ جوبالارىن دايىنداۋى قاجەت»، - دەپ جازدى ەرلان قارين Facebook-تەگى پاراقشاسىندا.

ونىڭ اتاپ وتۋىنشە، جوسپاردىڭ ورىندالۋى پرەزيدەنت اكىمشىلىگىنىڭ قاتاڭ باقىلاۋىندا تۇر./

«ءار اپتادا مەملەكەتتىك ورگانداردىڭ جوسپاردا بەكىتىلگەن مىندەتتەردىڭ ورىندالۋى تۋرالى اقپاراتى تىڭدالادى. ودان باسقا، ارىپتەستەرمەن ۇلتتىق كەڭەستىڭ اياسىندا الداعى ۋاقىتتا اتقارىلاتىن جۇمىستاردىڭ جالپى باعىتىن تالقىلادىق. ورتاق تۇسىنىك بار. الدا ۇلكەن جۇمىس كۇتىپ تۇر»، - دەپ اتاپ وتكەن ەرلان قارين.