بولات باقاۋوۆ ەكى ايعا قاماۋعا الىندى

پاۆلودار. قازاقپارات - پاۆلودار وبلىسىنىڭ اكىمى بولات باقاۋوۆ ەكى ايعا قاماۋعا الىندى. شەشىم پاۆلوداردىڭ مامانداندىرىلعان تەرگەۋ سوتىندا قابىلداندى، دەپ حابارلايدى قازاقپارات.

«باقاۋوۆتى ەكى ايعا قاماۋعا الۋ شاراسى سانكتسيالانسىن. قاماۋدا ۇستاۋ مەرزىمى ۇستالعان ۋاقىتىنان باستاپ ەسەپتەلسىن»، - دەدى ءماجىلىس بارىسىندا سۋديا بالتاباي دۇنبەكبايەۆ.

بولات باقاۋوۆقا قازاقستاننىڭ قىلمىستىق كودەكسىنىڭ 362- بابى 4-بولىگى ءۇشىنشى پۋنكتى بويىنشا قىلمىس جاسادى دەگەن كۇدىك كەلتىرىلىپ وتىر. اتالمىش باپتار وزىنە جانە وزگە ازاماتتار مەن ۇيىم ءۇشىن پايدا تابۋ ماقساتىندا قىزمەتتىك وكىلەتتىگىن اسىرا پايدالانۋ دەگەندى بىلدىرەدى. مۇنداي قىلمىس جاساعانى ءۇشىن مال-مۇلكى تاركىلەنىپ، 5 تەن 10 جىلعا دەيىن سوتتالادى جانە قانداي دا ءبىر لاۋازىمدى اتقارۋعا تىيىم سالىنادى.

پروكۋرور رۋستام ءسادۋاقاسوۆ سوتتان بولات باقاۋوۆتى ەكى ايعا نەمەسە 16- ناۋرىزعا دەيىن قاماۋدا ۇستاۋدى سۇرادى. سەبەبى وبلىستىڭ ەكس-اكىم بوستاندىقتا جازادان قاشىپ بولماسا تەرگەۋ جۇمىستارىنا كەدەرگى كەلتىرۋى مۇمكىن.

ءوز كەزەگىندە بولات باقاۋوۆ وزىنە تاعىلىپ وتىرعان ايىپپەن كەلىسپەيتىنىن ايتتى.

وسىعان دەيىن ق ر  ۇ ق ك پاۆلودار وبلىسىنىڭ اكىمى بولات باقاۋوۆقا قاتىستى قىلمىستىق ءىس قوزعاعانى حابارلانعان بولاتىن.