پرەزيدەنتتىك كادر رەزەرۆىنە ەنگەن ەكى جاس الماتىدا اۋدان اكىمدەرى بولدى
اۋدانداردىڭ جاڭا اكىمدەرىن تانىستىرعان الماتى اكىمى باقىتجان ساعىنتايەۆ ولاردىڭ پرەزيدەنتتىك جاستار كادرى رەزەرۆىنىڭ وكىلدەرى ەكەنىن اتاپ ءوتتى.
«مەملەكەت باسشىسىنىڭ دارىندى جاستار ءۇشىن اشىق جانە ءتيىمدى الەۋمەتتىك ليفت قۇرۋ جونىندەگى يدەياسى ىسكە اسۋدا. الماتىدان رەزەرۆتەر قاتارىنا 39 ادام ەندى. بۇگىنگى كانديداتتار - اۋداندار اكىمدەرى بولىپ قىزمەت اتقارۋعا بارىنشا دايىندىقتان وتكەندەر. ءبىز ولاردان اتالعان اۋدانداردا تۇراتىن الماتىلىقتاردىڭ ءومىر ءسۇرۋ ساپاسىن جاقسارتۋدا ناتيجەلى جۇمىستاردى كۇتەمىز»، - دەدى الماتى اكىمى باقىتجان ساعىنتايەۆ.
الاتاۋ اۋدانىنىڭ جاڭا اكىمى ازامات قالدىبەكوۆ بۇگىنگى كۇنگە دەيىن الماتى قالاسى جەر قاتىناستارى باسقارماسى باسشىسىنىڭ ورىنباسارى لاۋازىمىندا بولدى.
تۇركسىب اۋدانىنا اكىم بولىپ تاعايىندالعان باقىتجان اقجاروۆ الماتىنىڭ تۇرعىن ءۇي ساياساتى باسقارماسىنىڭ باسشىسى قىزمەتىن اتقاردى.
الاتاۋ جانە تۇركسىب اۋداندارىنىڭ بۇرىنعى اكىمدەرى ش. رىسپايەۆ پەن پ. كۋلاگين ءوز ەرىكتەرىمەن ءوتىنىش بەرۋلەرىنە سايكەس قىزمەتتەرىنەن بوساتىلدى.
اۆتور: الما مۇقانوۆا