قازاقستاننىڭ كولىك قۇراستىرۋ سالاسى يمپورتتى ىسىرا الا ما؟

None
None
نۇر-سۇلتان. قازاقپارات - قازاقستاننىڭ كولىك جاساۋ سالاسى يمپورتتى ىسىرۋعا قاۋقارلى ما؟

بۇل سۇراققا و ك ق- دا وتكەن باسپا ءسوز ءماسليحاتىندا «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ جاۋاپ بەردى، دەپ حابارلايدى قازاقپارات ءتىلشىسى.

«كولىك سالاسىنا تەرەڭ تالداۋ جۇرگىزىپ كوردىك. ماسەلەن، قۇرىلعىلاردىڭ ءبىرشاما ۇلەسىن ۇلكەن جوبالار بويىنشا ت ش و (تەڭىزشيەۆرويل) ساتىپ الادى. البەتتە، كەن نەمەسە مۇناي ءوندىرۋ سالاسىندا «Caterpillar» شىعاراتىن (ارنايى تەحنيكا شىعاراتىن الىپ كورپوراتسيا) ارنايى تەحنيكا كەرەك بولۋى مۇمكىن. ال بىزدە قازىر ەنەرگوكولىك قۇراۋ سالاسىندا مۇمكىندىكتەر بارشىلىق. ءسوزسىز، بۇل تۇرعىدا وتاندىق قاجەتتىلىكتىڭ 80-85 پايىزىن «Alageum Electric» حولدينگى جاۋىپ وتىر. وعان قاراستى 7 زاۋىت قاجەتتىلىكتى تولىق وتەۋى مۇمكىن. ءبىراق، مۇندا ماسەلە - قاداعالاۋدا وتىرعان مەملەكەتتىك ساتىپ الۋدىڭ وزىندە پودستانسالار مەن ترانسفورماتورلاردى وكىنىشكە قاراي، شەتەلدەن يمپورتتاپ وتىرعاندار بار»، - دەدى ابىلاي مىرزاحمەتوۆ.

ونىڭ ايتۋىنا قاراعاندا، ەكىنشىدەن وتاندىق اۆتوكولىك قۇراۋ سالاسىندا دا ايتۋلى جوبالار بارشىلىق. ەلدەگى «سارىارقا اۆتو ءوندىرىس»، «بيپەك»، «ازيا اۆتو» سەكىلدى كولىك وندىرەتىن ءىرى كومپانيالار مەملەكەتتىڭ قولداۋىمەن ءوندىرىسىن جولعا قويىپ العان.

«ءبىراق لوكاليزاتسيانىڭ، ياعني جاپپاي ساتۋدىڭ اۋقىمدى دەڭگەيىن كورىپ وتىرعان جوقپىز. دەسە دە، تاپسىرىستار جوق ەمەس. «سارىارقا اۆتو ءوندىرىس» كومپانياسىنا سالماقتى ينۆەستوردىڭ كىرگەنىنەن حاباردارسىزدار. سونىمەن بىرگە، «Astana Motors» كومپانياسى كەلەسى جىلدىڭ قىركۇيەگىنەن باستاپ يندۋستريالىق اۋماقتى ىسكە قوسپاق. ولار ءىرى توراپتى قۇراۋ مەن بوياۋ جۇمىسىن اتقارىپ قانا قويماي، «Hyundai» كومپانياسىمەن بىرگە قازاقستاننان تىس نارىقتى كوزدەيدى. قازاقستاندا كولىككە سۇرانىس ايتارلىقتاي ۇلكەن ەمەس. ولار كولىكتى رەسەي مەن وزبەكستانعا شىعارۋدى جوسپارلاۋدا»، - دەدى ول.

وسىلايشا، كولىك سالاسىندا ءىرى كومپانيالار پلاستيكتەن ورىندىق، بامپەر جاساپ، ءوندىرىس اۋقىمىن كەڭەيتۋدى جوسپارلاعان.

«ونىڭ ۇستىنە قازاقستاندا بيىل شىنى زاۋىتى ىسكە قوسىلسا، يندۋستريا سۇرانىستى ارتتىرا بەرەدى. سونىمەن بىرگە اۋىل شارۋاشىلىعى سالاسىنداعى كولىكتى قۇراۋ ءىسىن جەتىلدىرۋ ءۇشىن «Claas» پەن «John Deere» كومپانيالارىمەن كەلىسسوزدەر جۇرگىزىلۋدە. مىنە، وسى سالالاردا كولىك قۇراۋ ءىسىن دامىتا الامىز»، - دەدى ول.

ەسكە سالا كەتسەك، ەلىمىزدە «اتامەكەن» ۇلتتىق كاسىپكەرلەر پالاتاسى جانىنان يمپورتتى الماستىرۋ جونىندەگى كەڭەس قۇرىلادى. كەڭەس الاڭىندا بيزنەس-قوعامداستىق ۋاكىلەتتى مەملەكەتتىك ورگاندارمەن، ۇيىمدارمەن بىرلەسىپ، جەرگىلىكتى قامتۋدى جانە رەتتەلەتىن ساتىپ الۋ جۇيەسىن، كەدەندىك-تاريفتىك ساياساتتى، تەحنيكالىق رەتتەۋ، شيكىزات بازاسىن دامىتۋ، ينفراقۇرىلىمدىق دامۋ، مەملەكەتتىك قولداۋ شارالارىنىڭ تيىمدىلىگىن ارتتىرۋ، ونەركاسىپتىك كووپەراتسيانى دامىتۋ، سونداي-اق وڭدەۋ ونەركاسىبى دامۋىنا بايلانىستى باسقا ماسەلەلەردى تالقىلايدى.


سوڭعى جاڭالىقتار