پاۆلوداردا «اباي ءار ءۇيدىڭ تورىندە» اكسياسى ءجۇرىپ جاتىر

None
None
پاۆلودار. قازاقپارات - پاۆلوداردا «اباي ءار ءۇيدىڭ تورىندە» كىتاپ سىيلاۋ اكسياسى باستالدى، دەپ حابارلايدى pavlodarnews.kz.

س. تورايعىروۆ اتىنداعى وبلىستىق امبەباپ عىلىمي كىتاپحاناسى قازاقتىڭ ۇلى ويشىلى، فيلوسوف، اقىن، اعارتۋشى ابايدىڭ تۋعانىنا 175 جىل تولۋىنا وراي اقىننىڭ مەرەيتويىن كەڭ كولەمدە اتاپ ءوتۋ ماقساتىندا ءبىرقاتار تىڭ باستامالاردى قولعا الۋدا.

سونىڭ ءبىرى - «اباي ءار ءۇيدىڭ تورىندە» اكسياسى اياسىندا قوعامدىق ورىنداردا قالا تۇرعىندارى مەن قوناقتارى اراسىندا كەمەڭگەر تۋرالى ساۋالنامالار جۇرگىزىلەدى. سونداي-اق شارا بارىسىندا اباي شىعارمالارى، سونىڭ ىشىندە ولەڭدەرى مەن قارا سوزدەرىن مانەرلەپ وقىعان، كومپوزيتوردىڭ اندەرىن ناقىشىنا كەلتىرە شىرقاعان تۇرعىندارعا ابايدىڭ كىتاپتارى سىيعا بەرىلەدى. اكسيانىڭ العاشقى شاراسى پاۆلودار قالاسىنداعى «Batyr mall» ساۋدا جانە ويىن-ساۋىق ورتالىعىندا ءوتتى. ەڭ العاشقى بولىپ ساۋالناماعا جاۋاپ بەرۋشى – پ م پ ۋ- ءدىڭ 2-كۋرس ستۋدەنتى ءدىلناز كارىموۆا «جاسىمدا عىلىم بار دەپ ەسكەرمەدىم» ولەڭىن جاتقا وقىپ بەردى.

«قازاق ءتىلى مەن ادەبيەتى مۇعالىمى ماماندىعى بويىنشا ءبىلىم الاتىندىقتان ابايدىڭ بىرنەشە ولەڭىن بىلەمىن. قازاقتىڭ وزگە اقىندارىنىڭ ولەڭدەرىن جاتقا بىلەمىن. ابايدى ءار قازاق ءبىلۋى ءتيىس دەپ سانايمىن»، - دەيدى ءدىلناز كارىموۆا.

كىتاپحانا باسشىسىنىڭ ورىنباسارى بارشاگۇل بايجانوۆا ساۋدا ورتالىعىندا 15 تەن استام كىتاپ سىيعا تارتىلعانىن ايتتى. «Batyr mall ورتالىعىنا 20 كىتاپ اكەلگەن بولاتىنبىز»، - دەدى بارشاگۇل بايجانوۆا. «1 ساعاتتىڭ كولەمىندە 15 تەن استام ادام ابايدىڭ شىعارمالارىنان ءۇزىندى ايتىپ بەردى. كوبىسى ولەڭدەرىن وقۋدا. ءبىر-ەكى ادام ءانىن ورىندادى. جالپى، جاۋاپ بەرگەندەردىڭ باسىم بولىگى جاستار. جاستاردىڭ اقىننىڭ شىعارماشىلىعىن بىلگەنى قۋانتادى. اكسيادا كىتاپتى سىيعا تارتامىز. ۇلى ويشىلدىڭ كىتابى ءار ءۇيدىڭ تورىندە تۇرۋ قاجەت».

سوڭعى جاڭالىقتار