داۋرەن ابايەۆ شەتەلدە تىركەلگەن كولىكتەرگە قاتىستى پىكىر ءبىلدىردى

نۇر-سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ وزگە ەلدە تىركەلگەن اۆتوكولىكتەرگە تىيىم سالۋعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل شارالاردا قوسارلانعان ستاندارت جوق. ادامدار شەتەلدە تىركەلگەن اۆتوكولىكتى ساتىپ العاندا ەسەپكە قويۋ، باج جانە سالىق تولەۋ كەرەكتىگىن جاقسى ءبىلدى. ءبىراق، سوعان قاراماستان سانالى تۇردە سىرتتان كولىك اكەلىپ، ونى تىركەۋگە قويمادى. مۇندا اۆتوكولىكتىڭ قاۋپى جوعارى مۇلىك ەكەنىن، ونىڭ يەسى بولۋى كەرەكتىگىن تۇسىنگەن ءجون. ەندى تىركەلمەگەن كولىك يەلەرى جول ەرەجەسىن بۇزىپ، اپات ورنىنان قاشىپ، ەش جازاعا ىلىنبەيتىندەرىن ءبىلدى. وسىنداي جۇرگىزۋشىلەردىڭ كەسىرىنەن ءى ءى م دەرەگى بويىنشا، 132 ادام كوز جۇمدى»، - دەدى مينيستر حابار ارناسىنداعى «اشىق ديالوگ» باعدارلاماسىندا.

ونىڭ ايتۋىنشا، كوپتەگەن كولىكتەرگە تىيىم سالىنعان، ۇرلانعان نەمەسە كەپىلدە تۇر. ەگەر ولاردىڭ يەلەرىنە سوت پريستاۆى كەلسە، بۇل مۇلىك زاڭدى تۇردە الىنادى.

«جانە ەڭ قىزىعى، وسى كولىكتەردىڭ قازاقستاندىق يەلەرى مەملەكەتتەن ادىلدىكتى تالاپ ەتىپ، نارازىلىق بىلدىرەدى. ولار سالىق پەن ايىپپۇلدان جالتارادى. ەلىمىزدە شەتەلدىك تىركەۋى بار 200 مىڭ ماشينا بار. ولار ءبىزدىڭ جولىمىزدا جۇرەدى، اۋامىزدى لاستايدى، ءبىراق ولار ءۇشىن ءوزىمىزدىڭ زاڭدى ساقتايتىن ازاماتتارىمىز اقى تولەيدى»، - دەدى د. ابايەۆ.