جاردەماقى ۇلكەندەرگە ەمەس، بالالارعا بەرىلەدى - داۋرەن ابايەۆ

None
None
نۇر-سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ جاڭا الەۋمەتتىك تولەمگە كوڭىلى تولمايتىن كوپبالالى انالار تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«كەز كەلگەن رەفورماعا كوڭىلى تولمايتىندار تابىلادى. ءبىراق، بۇل بارلىعىنا ۇنامادى دەگەن ءسوز ەمەس. سوندىقتان، مەملەكەت باياعى قاتەلىكتەرىن قايتالادى دەپ ايتۋعا بولمايدى. قازىردىڭ وزىندە 400 مىڭ وتباسى - 2,5 ميلليون ادام جاردەماقى الىپ ۇلگەردى. از قامتىلعان ساناتقا جاتپايتىن، ءبىراق 4 بالا ءوسىرىپ وتىرعاندارعا دا كومەكتەسۋ كەرەك»، - دەدى مينيستر «حابار» ارناسىنداعى «اشىق ديالوگ» باعدارلاماسىندا.

ونىڭ ايتۋىنشا، بارلىق كوپبالالى اتا-انالار ايانباي جۇمىس ىستەپ، كوپ نارسەدەن باس تارتۋعا ءماجبۇر.

«نەسيە الىپ، ۋاقىتىندا تولەۋگە مىندەتتەلگەندەر بار. ولار دا بالالارىن جاقسى كيىندىرىپ، قولايلى جاعدايدا وسىرگىسى كەلەدى. نەگە ولارعا مەملەكەت كومەكتەسپەۋى كەرەك؟ از قامتىلعان ازاماتتارعا مەملەكەت جۇمىس تاۋىپ بەرۋگە مىندەتتى، ال جاردەماقى تابىس كولەمىنەن تىس بارلىق كوپبالالى وتباسىلارعا بەرىلەدى. كوپ بالالارعا بەرىلەتىن بۇل جاردەماقى ەڭبەككە جارامدى ۇلكەندەرگە ەمەس، بالالارعا بەرىلىپ وتىر. وسىنى ءتۇسىنۋ قاجەت»، - دەدى د. ابايەۆ.

ەستەرىڭىزگە سالا كەتەيىك، 2020-جىلعى 1- قاڭتاردان باستاپ 4 جانە ودان دا كوپ كامەلەتكە تولماعان بالالارى بار نەمەسە 23 جاسقا دەيىنگى كۇندىزگى وقۋ بولىمىندە وقيتىن ستۋدەنتتەرى بار وتباسىلارعا جاڭا مەملەكەتتىك جاردەماقى بەرىلەدى.

اتالعان مەملەكەتتىك جاردەماقى وتباسىنىڭ تابىسىنا قاراماستان سارالانعان مولشەردە: 4 بالاعا - 42496 تەڭگە؛ 5 بالاعا - 53127 تەڭگە؛ 6 بالاعا - 63757 تەڭگە؛ 7 جانە ودان دا كوپ بالاعا - 74388 تەڭگە تولەنەدى.

جالپى العاندا، 2020-جىلى كوپبالالى وتباسىلارعا مەملەكەتتىك جاردەماقى تولەۋگە 177,6 ميلليارد تەڭگە كوزدەلگەن. بۇل جاردەماقىنى 346,8 مىڭ وتباسى الاتىن بولادى.

سوڭعى جاڭالىقتار