بالاندين بەيجىڭدەگى حالىقارالىق ءجۇزۋ جارىسىنىڭ ەكىنشى كەزەڭىنە قاتىسادى

None
None
بەيجىڭ. قازاقپارات - دميتري بالاندين قىتاي استاناسىندا وتەتىن حالىقارالىق ءجۇزۋ فەدەراتسياسىنىڭ تۋرنيرىنىڭ ەكىنشى كەزەڭىنە قاتىسادى، دەپ حابارلايدى «قازاقپارات» ح ا ا ءتىلشىسى.

اتالمىش شارا قاڭتاردىڭ 18-19-ارالىعىندا وتەدى. وندا الەمنىڭ 25 ەلىنەن كەلگەن 60 جۇزگىش Champions Swim Series ءتۋرنيرىنىڭ 28 جەكە جانە 2 كوماندالىق باسەكەلەرىندە باق سىنايدى.

قازاقستاندىق سپورتشى براسس ادىسىمەن 100 جانە 200 مەتر ارا قاشىقتىققا ارنالعان جارىستا ونەر كورسەتەدى. بەيجىڭنىڭ Champions Swim Series كەزەڭىنىڭ جالپى سىيلىق قورى 900 مىڭ دوللاردى قۇرايدى. ءبىرىنشى ورىن العان ادام 10 مىڭ دوللار، ەكىنشى ورىن 8 مىڭ دوللار، ءۇشىنشى ورىن العان ادام 6 مىڭ دوللار الادى.

وسىعان دەيىن د. بالاندين شىنجەندە (وڭتۇستىك قىتاي) جۇزۋدەن وتكەن حالىقارالىق جارىس سەرياسىنىڭ ءبىرىنشى كەزەڭىندە ەكى «قولا» جەڭىپ العان.

ريو-2016 وليمپياداسىنىڭ چەمپيونى دميتري بالاندين قازاقپارات تىلشىسىنە بەرگەن سۇحباتىندا شەنچجەندەگى جارىستان العان اسەرلەرىمەن بولىسكەن ەدى. ول ءوزىنىڭ تاپ وسى كەزدەگى دەنە دايىندىعىنا ساي جاقسى جۇزگەنىن ايتتى.

دميتري قىتايعا كەلەردىڭ الدىندا 5 كۇن بۇرىن سۋىق تيگىزىپ الىپ، دەنە قىزۋى كوتەرىلىپ، دايىندىقتى تەك جارىسقا قاتىساردىڭ الدىندا عانا جاساي العان.

«ەندى جىلدامدىقتى ارتتىرۋعا تىرىسام، شەنچجەندە ءبىراز قالپىما كەلدىم عوي، ەندى كورەمىز نە بولاتىنىن»، - دەپ قوستى ول.

«Champions Swim Series جارىسى الەمنىڭ مىقتى دەگەن جۇزگىشتەرىمەن باق سىناسىپ، جاقسى تاجىريبە جيناۋ ءۇشىن كەرەمەت مۇمكىندىك. بۇل جارىستار ءبىر جاعىنان ماڭىزدى، ويتكەنى ول ءجۇزۋ سپورتىن ايتارلىقتاي ناسيحاتتايدى. بۇل وسىنداي شوۋ. ەكىنشى جاعىنان سپورتشىلار مۇندا ماتەريالدىق جاعداي ءۇشىن دە قاتىسۋعا ۇمتىلىپ جاتىر. جالپى العاندا سوڭعى ۋاقىتتا جۇزۋدەن كوممەرتسيالىق جارىستاردىڭ كوپتەپ ۇيىمداستىرىلا باستاعانى قۋانتادى»، دەدى د. بالاندين.

حالىقارالىق ءجۇزۋ فەدەراتسياسى Champions Swim Series جارىسىن 2019 -جىلى بەكىتتى. بۇل جارىسقا وليمپيادا ويىندارى مەن الەم چەمپيوناتتارىنىڭ جەڭىمپازدارى جانە رەكوردشىلار سياقتى ەڭ ۇزدىك دەگەن سپورتشىلار ونەر كورسەتەدى. FINA- نىڭ قولداۋىمەن جىل سايىن وسىنداي 2-3 جارىس وتەدى. وتكەن جىلى جارىستار گۋاڭجوۋ، بۋداپەشت پەن يندياناپوليستە ءوتتى. بۇل جارىستاردىڭ فيناليستەرى مەن قاتىسۋشىلارىنا الەمدىك رەيتينگتە ۇپاي قوسىلادى.

رۋسلان سۇلەيمەنوۆ


سوڭعى جاڭالىقتار