ا ق ش پەن قىتاي ساۋدا كەلىسىمىنە قول قويدى
قۇجاتقا ساي، ا ق ش الداعى ەكى جىلدا قىتايعا يمپورت كولەمىن 200 ميلليارد دوللارعا ءوسىرۋى ءتيىس. بۇدان بولەك، قىتاي تاۋارلارىنا سالىناتىن امەريكالىق سالىق تا ازايۋى كەرەك. كەلىسىم دە ەكى ەل اراسىنداعى ساۋدا داۋىن رەتتەۋ جاعى دا قاراستىرىلعان.
كەلىسىمدە ينتەللەكتۋالدى جەكەمەنشىكتى قورعاۋ، امەريكالىق تاۋارلاردى، سونىڭ ىشىندە اۋىل شارۋاشىلىعى جانە ەنەرگەتيكا تاۋالارىن ساتىپ الۋدى كوبەيتۋ، ا ق ش- تىڭ قارجىلىق قىزمەتتەرىنە سالىنعان كەدەرگىلەردى الىپ تاستاۋ، ا ق ش پەن قىتاي اراسىنداعى ساۋدا قارىم-قاتىناسىنداعى تەپە-تەڭدىكتى قالپىنا كەلتىرۋ جايى دا ايتىلعان. بۇعان قوسا، قىتاي بىرنەشە سالادا ۇلكەن رەفورمالار جاساۋى ءتيىس.
ال ەكى ەل اراسىنداعى ساۋدا تارتىسى كەزىندە قويىلعان ەكسپورت سالاسىنداعى تاريفتەر كۇشىندە قالا بەرمەك. ۆاشينگتون ەكسپورتتاعى تاريفتەردىڭ كوبىن ساقتاپ قالىپ، الداعى ۋاقىتتا كەلىسسوزدەردە پايدالانعىسى كەلەدى.
بۇل - پەكين مەن ۆاشينگتون اراسىنداعى ساۋدا كەلىسىمىنىڭ ءبىرىنشى بولىگى. ەكى ەل اراسىنداعى ساۋدا كەلىسسوزدەرى ءالى دە جالعاسادى.
ترامپ ساۋدا كەلىسىمىن «قاتەلىكتى تۇزەۋ» جانە «الەمدەگى تۇراقتىلىققا اسەر ەتەتىن قادام» دەپ اتادى.
ەكى ەل كەلىسىمگە قول قويعان سوڭ ەتالون ماركالى مۇناي باعاسى ءوسىپ، الەمدىك قارجى قورلارىنداعى اكتسيا رەكوردتىق كورسەتكىشكە جەتتى.
ا ق ش پەن قىتاي اراسىنداعى ساۋدا داۋى 2018-جىلى باستالعان. ۆاشينگتون پەكيندى «بيزنەستى ادىلەتسىز جۇرگىزدى» دەپ ايىپتايدى. بۇعان دەيىن ترامپ قىتاي تاۋارلارىنا سالىقتى وسىرگەن. كەيىن قىتاي دا وسىنداي قادامعا بارعان.
«ازاتتىق»