ابايدىڭ شەتەل تىلىندەگى شىعارمالارى ءار وبلىس ورتالىعىنداعى كىتاپحاناعا قويىلادى

نۇر-سۇلتان. قازاقپارات - اباي شىعارمالارى جيناعىنىڭ شەت تىلىنە اۋدارىلعان نۇسقاسى بارلىق وبلىستاعى ورتالىق كىتاپحانادا بولادى.

بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز كونفەرەنتسياسىندا ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ ايتتى، دەپ حابارلايدى قازاقپارات ءتىلشىسى.

ابايدىڭ 175 جىلدىق مەرەيتويىنا ارنالعان ماڭىزدى جوبالاردىڭ ءبىرى - شىعارمالار جيناعىن شەتەلدىڭ 10 تىلىنە اۋدارۋ جانە شىعارۋ.

«ابايدىڭ شەت تىلىنە اۋدارىلعان جيناقتارى وبلىس ورتالىقتارى مەن رەسپۋبليكا كولەمىندەگى بارلىق كىتاپحانالاردا تۇراتىن بولادى. شەت تىلىنە اۋدارىلعان جيناقتاردى حالىققا كورسەتۋ ماقساتىندا جۇمىستارى جۇرگىزىلەدى»، - دەيدى نۇرعيسا داۋەشوۆ.

ول جيناقتاردىڭ ەلەكتروندى نۇسقاسىن شىعارۋ جايى دا ەسكەرىلگەن.

«شەت تىلىنە اۋدارىلعان جيناقتار قاعاز كۇيىندە دە، ەلەكتروندى نۇسقادا دا بولادى. ونى بەلگىلى ءبىر ينتەرنەت رەسۋرستارعا سالىپ، جاستاردىڭ اقىن شىعارمالارىمەن تانىسۋىنا جاعداي جاسايمىز»، - دەدى ول.

ەسكە سالا كەتسەك، بىلتىر 26- تامىزدا ق ر پرەزيدەنتى قاسىم-جومارت توقايەۆتىڭ جارلىعىمەن ابايدىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ قۇرامى بەكىتىلگەن بولاتىن.

جوسپار 82 تارماقتى قامتيدى، سولاردىڭ ىشىندە ءىرى حالىقارالىق جانە رەسپۋبليكالىق قوعامدىق ماڭىزى بار، عىلىمي، اعارتۋشىلىق ءىس-شارالار، كونفەرەنسيالار، سيمپوزيۋمدار، دوڭگەلەك ۇستەلدەر، سىنىپ ساعاتتار، پوەتيكالىق جانە ادەبي كونكۋرستار، باسپا ءسوز تۋرلارى جانە وزگە دە ءىس-شارالار بار.