كوك شاي ءومىردى ۇزارتادى - زەرتتەۋ

نۇر-سۇلتان. قازاقپارات - عالىمدار جاڭا زەرتتەۋ ناتيجەسىندە اپتاسىنا ءۇش رەت كوك شاي ءىشۋ جۇرەك-قانتامىر اۋرۋلارىنان بولاتىن ءولىم قاۋپىن تومەندەتىپ، ۇزاق ءومىر سۇرۋگە اسەر ەتەدى دەگەن توقتامعا كەلدى، دەپ جازادى قازاقپارات CNN رەسۋرسىنا سىلتەمە جاساپ.

قىتاي عالىمدارىنىڭ ايتۋىنشا، قارا شايدان گورى كوك شايدىڭ دەنساۋلىققا پايداسى مول. زەرتتەۋگە 100902 ادام قاتىسقان جانە ولار جەتى جىل بويى باقىلاۋدا بولعان. زەرتتەۋ ناتيجەسىندە كوك شاي ىشەتىندەردە جۇرەك اۋرۋى مەن ينسۋلت قاۋپى 20 پايىزعا تومەن بولعان.

قىتايدىڭ جۇرەك-قانتامىر اۋرۋلارى ۇلتتىق ورتالىعىنىڭ، بەيجىڭ مەديتسينا كوللەدجىنىڭ، قىتاي مەديتسينا عىلىمىنىڭ اكادەمياسى بىرلەسىپ جۇرگىزگەن زەرتتەۋدە 50 دەن اسقان شاي ىشپەيتىن ادامدار شاي ىشەتىندەرگە قاراعاندا 1,6 جاسقا از ءومىر سۇرەتىنى انىقتالعان.

عالىمداردىڭ ايتۋىنشا، كوك شاي جۇرەك-قانتامىر اۋرۋلارىنان قورعايدى. ال قارا شاي كوك شاي سياقتى وڭدەلمەيتىندىكتەن، ونىڭ تيىمدىلىگى تومەن.