قازاقستاندا ءىرى بيزنەستىڭ «عۇمىرى» ۇزاق - زەرتتەۋ
«وسى جىلدىڭ قاڭتارىندا قازاقستاندا 446,7 مىڭ زاڭدى تۇلعا تىركەلدى. بۇل ءبىر جىل بۇرىنعى كورسەتكىشتەن 3 پايىزعا كوپ. سالىستىرۋ ءۇشىن ايتار بولساق، وتكەن جىلدىڭ ءدال وسى كەزەڭىندە 433,8 كاسىپورىن تىركەلىپ، ءبىر جىلداعى ءوسىم 5,1 پايىز بولعان ەدى. ونىڭ ىشىندە جۇمىس ىستەپ تۇرعان كومپانيالاردىڭ سانى 308 مىڭعا جەتتى. جىلدىق ءوسىم بىردەن 10,1 پايىزعا ارتتى. قۇرىلعانىنا ءبىر جىل بولماعان كومپانيالار سانى - 36,1 مىڭ. ال ءبىر جىل بۇرىن ولاردىڭ سانى 38,6 مىڭ بولعان. ءبىر جىلدان 5 جىلعا دەيىن جۇمىس ىستەپ تۇرعان كومپانيالار سانى - 119,9 مىڭ» دەلىنگەن تاراتىلعان اقپاراتتا.
Finprom.kz مالىمەتىنشە، قازاقستاندا جۇمىس ىستەپ تۇرعان كومپانيالاردىڭ 19,3 پايىزىنىڭ قۇرىلۋ تاريحى 6-10 جىلدى، 14,6 پايىزى 11-15 جىلدى، 9,3 پايىزى 16-20 جىلدى، 5,2 پايىزى 21-25 جىلدى قۇرايدى. شاعىن كاسىپورىنداردىڭ تەك 0,9 پايىزى عانا ەلىمىزدىڭ نارىعىندا 25 جىلدان استام ۋاقىتتان بەرى جۇمىس ىستەپ كەلەدى.
«كاسىپورىننىڭ نارىقتا ۇزاق ۋاقىت جۇمىس ىستەۋى ونىڭ كولەمىنە بايلانىستى ەكەندىگى انىق بايقالادى. ايتالىق ءىرى بيزنەس سەگمەنتىندە نارىقتا 25 جىلدان استام ۋاقىت جۇمىس ىستەپ كەلە جاتقان كومپانيالاردىڭ سانى 3,3 پايىز بولسا، ورتا بيزنەستە 2,5, ال شاعىن بيزنەستە نە ءبارى 0,9 پايىزدى قۇرايدى»، - دەپ اتاپ وتەدى Finprom.kz.