قىتايدان كەلگەن جولاۋشىلار ءجىتى تەكسەرىلۋدە
باس سانيتار دارىگەردىڭ تاپسىرماسىمەن جولاۋشىلارعا ارنايى جادىنامالار تاراتىلىپ، اۋرۋدىڭ الدىن الۋ شارالارى جۇرگىزىلۋدە.
الەمدە بۇرىن- سوڭدى بولماعان بۇل دەرتتىڭ بەلگىلەرى قانداي؟ ا ءتيپتى پنيەۆمونيا اۋرۋى قىتايدىڭ ۋحان قالاسىندا وتكەن جىلدىڭ سوڭىندا تىركەلگەن.
ال ءبىزدىڭ ەلدەگى قوعامدىق دەنساۋلىق ساقتاۋ قىزمەتكەرلەرىنىڭ سوزىنشە، بۇرىن- سوڭدى بولماعان ۆيرۋستىڭ بەلگىلەرى قاراپايىم تۇماۋعا ۇقسايدى.
«بۇل اۋرۋ بۇرىن ادامداردا تىركەلمەگەن كوروناۆيرۋس. بۇنى ءبولىپ الىپ، لابوراتوريالاردا زەرتتەپ جاتىر. بۇل اۋرۋدىڭ كلينيكالىق كورىنىسى جالپى رەسپيراتورلىق سيندروم اۋرۋلارىمەن بىردەي. جەڭىل عانا تۇشكىرۋ جوتەلۋدەن باستالادى. ارمەن قاراي دەنە قىزۋىنىڭ كوتەرىلۋى، اۋىر دەمالۋ، پنيەۆمونيا وتە اۋىر جاعدايلاردا ولىمگە اكەلەدى»، - دەيدى ق ر ق د س و جۇقپالى اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆ.
ماماندار قىتايداعى ينفەكتسيالىق اۋرۋ جانۋارلار ارقىلى نەمەسە تەڭىز ونىمدەرىنەن تارالدى دەگەن پىكىردە. سوڭعى دەرەكتەرگە ساي اۋرۋدىڭ ادامنان ادامعا جۇعۋ فاكتىلەرى تىركەلمەگەن دەگەنمەن، ساقتىقتا قورلىق جوق. سوندىقتان شەكارادا قىتايدان كەلگەن جولاۋشىلار ءجىتى تەكسەرۋدەن وتەدى.
اۋەجايدىڭ سانيتارلىق- كارانتيندىك باقىلاۋ قىزمەتى حالىقارالىق رەيسپەن كەلگەن ءار جولاۋشىنى تەپلوۆيزور ارقىلى تەكسەرەدى. بۇل قۇرىلعى ادامنىڭ دەنە قىزۋىن انىقتايدى. ەگەر جولاۋشىنىڭ قىزۋى جوعارى بولسا، ول بىردەن وقشاۋلاندىرىلىپ مەديتسينالىق تەكسەرۋدەن وتەدى. جالپى جىل باسىنان بەرى قىتايدان قازاقستانعا 10 مىڭعا جۋىق جولاۋشى كەلگەن.
«قازىرگى تاڭدا قىتاي حالىق رەسپۋبليكاسىنان 28 اۋە رەيسى كەلەدى. ونىڭ 18- ءى - الماتى قالاسىنا، 10 رەيس - نۇر- سۇلتان قالاسىنا كەلەدى. حالىقارالىق رەيستەرگە شىعاتىن ەكيپاج مۇشەلەرىنە جادىنامالار تاراتىلدى. بارلىعىن وسى اۋرۋدىڭ الدىن الۋ جولدارىن جانە وسى اۋرۋ انىقتالعان كەزدە جۇرگىزىلەتىن الگوريتمدەرمەن تانىستىردىق»، - دەپ اتاپ ءوتتى ق ر د س م كولىكتەگى تاۋارلار مەن كورسەتىلەتىن قىزمەتتەردىڭ ساپاسىن باقىلاۋ دەپارتامەنتىنىڭ ءبولىم باسشىسى داريا ازىمبايەۆا.
قازاقستاندا كوروناۆيرۋس ينفەكسياسى تىركەلمەگەن. الايدا، قازىر تۇماۋدىڭ ءورشىپ تۇرعان كەزى. سايكەسىنشە، سۋىق ءتيىپ، اق حالاتتىلاردىڭ كومەگىنە جۇگىنگەندەردىڭ سانى ارتقان.
«تۇماۋمەن اۋىراتىن اۋرۋلار ماۋسىم كەزىندە تاۋلىگىنە 40 ادامعا دەيىن جەتەدى. ولاردىڭ 20-25- ءسى بىزدە اۋرۋحاناعا جاتقىزىلادى. ونىڭ كوبى - جۇكتى ايەلدەر»، - دەيدى كوپبەيىندى مەديتسينالىق ورتالىقتىڭ ينفەكتسيا ءبولىمىنىڭ مەڭگەرۋشىسى گۇلجانات شىرشىقپايەۆا.