شىمكەنتتە اۋدان اكىمدەرى جاپپاي اباقتىعا باردى

نۇر-سۇلتان. قازاقپارات – مەملەكەتتىك قىزمەتكەرلەر، ناقتىراق ايتساق، اكىمدەر، باسقارما جانە ءبولىم باسشىلارى ءۇشىن تەرگەۋ يزولياتورىنا ەكسكۋرسيا ۇيىمداستىرىلدى، دەپ حابارلايدى «حابار 24».

ولار تۇزەۋ مەكەمەسىنە ارنايى اۆتوبۋسپەن جەتكىزىلىپ، باس بوستاندىعىنان ايىرىلعانداردىڭ تىرشىلىگىمەن تانىستى. مۇنداعى جاعدايدىڭ مەملەكەتتىك قىزمەتكەرلەرگە اسەر ەتكەنى سونشالىق، كەيبىرى كامەرا ىشىنە كىرۋدەن باس تارتتى.

جەمقورلىققا قارسى قىزمەت وكىلدەرىنىڭ ايتۋىنشا، بۇل شارالار كوپ ۇزاماي تيىمدىلىگىن كورسەتەتىن كورىنەدى. تەمىر توردا وتكىزگەن جارتى ساعات پارا الۋشىنى دا، بەرۋشىنى دە ويلاندىرادى، دەيدى ماماندار.

اگەنتتىگىنىڭ بۇل شارانى ۇيىمداستىرۋداعى باستى ماقساتى ايدان انىق. وسىلايشا شەنەۋنىكتەرگە تۇرمە تۋرالى ەسكەرتىپ، پارامەن دوستاسقانداردىڭ الدىندا قانداي جاعداي كۇتىپ تۇرعاندىعىن كورسەتكەندەي.

مەگاپوليستەگى ءتورت اۋدان اكىمى مەن ولاردىڭ ورىنباسارلارى، 22 باسقارمانىڭ باسشىسى مەن قىزمەتشىلەرى، بارلىعى 60-تان اسا شەنەۋنىك تۇرمەگە ارنايى اۆتوبۋسپەن جەتكىزىلدى. تۇرمەنىڭ احۋالىمەن تانىستىرعان اباقتى باستىعىنىڭ ءوزى بولدى. تۇرمەنىڭ ۇزىن دالىزىمەن ەرتىپ ءجۇرىپ، كامەرالار مەن ءار ءبولىمىن كورسەتىلدى. ايتا كەتۋ كەرەك، بۇگىندە مۇندا جازاسىن وتەپ جاتقان 490 ادامنىڭ 40-تان استامى بۇرىنعى مەملەكەتتىك قىزمەتكەر ەكەن.