قىزىلوردادا اۋدان تۇرعىندارى كوپىردەن وتۋگە قورقادى

جاڭاقورعان. قازاقپارات - سەنات دەپۋتاتتارى مۇرات باقتيار ۇلى مەن بەكمىرزا ەلامانوۆ قىزىلوردا وبلىسىنا جۇمىس ساپارى اياسىندا جاڭاقورعان اۋدانىنداعى سۇڭقات جانە تومەنارىق اۋىلدارىندا جەرگىلىكتى حالىقپەن، اۋداندىق مەكەمەلەردىڭ باسشىلارىمەن جانە ارداگەرلەر كەڭەسىنىڭ وكىلدەرىمەن كەزدەستى، دەپ حابارلايدى قازاقپارات.

كەزدەسۋ بارىسىندا « قىزىلوردا- سەمەي» جۇيرىك پويىزىنىڭ تومەنارىق ستانسىسىندا ايالداۋى، ايەلدەردىڭ زەينەتكەرلىك جاسىن تومەندەتۋ، حالىقتى اۋىزسۋمەن قامتۋ جانە وزگە دە ماسەلەلەر تالقىلاندى.

سەناتورلار اۋىلداعى اۋرۋحانا قۇرىلىسىنىڭ قۇجاتتارى قارالىپ جاتقانىن ايتا كەلىپ، كوپبالالى جانە از قامتىلعان وتباسىلار ءۇشىن جاڭا سيپاتتاعى الەۋمەتتىك كومەككە، سونداي-اق شاعىن جانە ورتا كاسىپكەرلىكتى دامىتۋ جونىندەگى جەڭىلدىكتەرمەن قوسا، اۋىل شارۋاشىلىعى سالاسىن دامىتۋعا بايلانىستى ەنگىزىلگەن وزگەرىستەرگە توقتالدى.

بۇدان بولەك، دەپۋتاتتار شيەلى اۋدانىنىڭ جۇرەك، بالابي جانە بايگەقۇم اۋىلدارىندا اۋرۋحانا قىزمەتكەرلەرىمەن جانە جەرگىلىكتى تۇرعىندارمەن كەزدەستى. جۇزدەسۋدە كوپبالالى انالار الەۋمەتتىك جاردەماقىعا قاتىستى سۇراقتارىن قويدى. سونىمەن قاتار، 3 اۋىلدىڭ تۇرعىندارى اۋىزسۋ ماسەلەسىن شەشۋدى جانە كوكتەمگى، كۇزگى كەزەڭدەردە جولداردى سۋ باساتىندىقتان، «نانساي» ارناسىنداعى كوپىردى جاڭارتۋدى سۇرادى. سەناتورلار بارلىق ماسەلەلەر تۇراقتى باقىلاۋدا بولاتىنىن، سونداي-اق جەكەلەگەن ماسەلەلەر پارلامەنت سەناتىندا تالقىلاناتىنىن اتاپ ءوتتى.

دەپۋتاتتار سونداي-اق قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ وقىتۋشى قۇرامىمەن جانە ستۋدەنتتەرمەن كەزدەستى. ونىڭ بارىسىندا «پەداگوگ مارتەبەسى تۋرالى» زاڭ ءتۇسىندىرىلدى. سەناتورلار سونىمەن قاتار ستۋدەنتتەرگە الكوگولمەن جانە ەسىرتكىمەن ماس بولۋدىڭ زياندى سالدارىن ەگجەي- تەگجەيلى ءتۇسىندىرىپ، ولاردىڭ قايتىمسىز زالالى مەن وسى ماسەلەلەرگە بايلانىستى زاڭداردىڭ وتە قاتاڭدىعى تۋرالى ايتىپ بەردى.

بۇدان بولەك، پالاتا وكىلدەرى ستۋدەنتتەر جاستار جىلى قوعامدىق ىستەرگە بەلسەندى قاتىسقانى ءۇشىن العىسىن ءبىلدىرىپ، جاستاردى قىزىلوردا ءوڭىرىنىڭ كوركەيۋىنە جانە قوعامدىق- الەۋمەتتىك ماسەلەلەردى شەشۋگە بەلسەنە قاتىسۋعا شاقىردى.