نۇرسۇلتان نازاربايەۆ پارلامەنت ءماجىلىسىنىڭ ءتوراعاسىن قابىلدادى
كەزدەسۋ بارىسىندا نۇرسۇلتان نازاربايەۆقا بىلتىر كۇزدە وتكەن كەڭەس بارىسىندا بەرىلگەن تاپسىرمالاردىڭ «نۇر-وتان» پارتياسى فراكسياسىنىڭ ورىنداۋى جونىندە مالىمەت بەرىلدى.
ەلباسى دەپۋتاتتاردىڭ ازاماتتاردىڭ سۇرانىستارىنا ۋاقىتىلى جاۋاپ بەرۋ جۇمىستارىن جالعاستىرۋدىڭ ماڭىزدىلىعىن اتاپ ءوتتى.
«حالىقتىڭ مۇڭ- مۇقتاجىنا قۇلاق اسىپ، ەتەنە جۇمىس جاساۋ قاجەت. بۇل - پارتيانىڭ، سونداي- اق بارلىق دەڭگەيدەگى دەپۋتاتتاردىڭ مىندەتى. ءبىزدىڭ ورتاق پارىزىمىز»، - دەدى قازاقستاننىڭ تۇڭعىش پرەزيدەنتى.
سونىمەن قاتار، نۇرسۇلتان نازاربايەۆ ەكونوميكالىق وسىمگە قول جەتكىزۋ، حالىقتىڭ ءال- اۋقاتىن ارتتىرۋ ءۇشىن اتقارۋشى جانە زاڭ شىعارۋشى بيلىك تارماقتارىنىڭ ۇيلەسىمدى جۇمىسىن قامتاماسىز ەتۋدىڭ ماڭىزدىلىعىنا توقتالدى.
«الدىمىزدا ەل ەكونوميكاسىنىڭ ءوسىمىن قاماتاماسىز ەتۋ مىندەتى تۇر. وسى ورايدا پارلامەنت پەن پارتيا بىرلەسە جۇمىس اتقارۋعا ءتيىس»، - دەدى ەلباسى.
سونىمەن بىرگە، نۇرسۇلتان نازاربايەۆ پارلامەنتتىڭ ءرولىن ارتتىرۋ ماسەلەسىنە نازار اۋدارۋ قاجەتتىگىن اتاپ ءوتتى.
«ۇكىمەتتى قالىپتاستىرۋدا پارلامەنت نەگىزگى ءرول اتقارۋعا ءتيىس. زاڭدار مەن باعدارلامالاردى بىرگە قابىلداپ، حالىققا بىرلەسە ەسەپ بەرگەنى ابزال»، - دەدى قازاقستاننىڭ تۇڭعىش پرەزيدەنتى.
كەزدەسۋ بارىسىندا نۇرلان نىعماتۋلين ەلباسىنا ءماجىلىس دەپۋتاتتارىنىڭ وڭىرلەرگە ساپارلارىنىڭ قورىتىندىلارى جانە پارلامەنتتىڭ تومەنگى پالاتاسىنىڭ زاڭ شىعارۋ قىزمەتى تۋرالى اقپارات ۇسىندى.
«وسى جىلدىڭ بەسىنشى قاڭتارىنان باستاپ دەپۋتاتتار، ونىڭ ىشىندە فراكسيا دەپۋتاتتارى ەلىمىزدىڭ بارلىق وڭىرلەرىن، شالعايدا جاتقان ەلدى مەكەندەردى ارالاپ شىقتى. بۇل كۇندەرى دەپۋتتار جۇرتشىلىقپەن شامامەن ءبىر جارىم مىڭ كەزدەسۋ وتكىزدى. وندا كوپتەگەن ماسەلەلەر كوتەرىلدى. سونىڭ ىشىندە، الەۋمەتتىك كومەكتىڭ جاڭا فورماتى، جاڭا دەنساۋلىق ساقتاۋ كودەكسى، حالىقتى جۇمىسپەن قامتۋ ماسەلەلەرى قوزعالدى. الداعى زاڭ شىعارۋ ىسىندە تۇرعىنداردىڭ بارلىق پىكىرلەرى مەن ۇسىنىستارى ەسكەرىلەدى. جالپى وتكەن جىلدىڭ قىركۇيەك ايىنان بەرى ءماجىلىس قاراۋىنا 97 زاڭ جوباسى ەنگىزىلدى. ونىڭ 37- ءسى قولداۋ تاۋىپ پارلامەنت سەناتىنا جولداندى»، - دەدى ءماجىلىس ءتوراعاسى.