قىرعىزستان مەن تاجىكستان شەكارا ماسەلەسىن شەشۋ ءۇشىن جەر الماسۋعا كەلىستى

None
None
نۇر-سۇلتان. قازاقپارات - تاجىكستاننىڭ يسفارين اۋدانى گۇلىستان اۋىلىندا قىرعىز- تاجىك شەكاراسىنداعى جاعدايعا بايلانىستى كەلىسسوز ءوتتى. ەكى ەل ۇكىمەت دەلەگاتسيالارىنىڭ كەزدەسۋى 14- قاڭتاردا تاڭەرتەڭ باستالىپ، جارىم تۇندە ءبىر- اق اياقتالدى.

ۇزاققا سوزىلعان كەلىسسوز كەزىندە تاراپتار التى ماسەلە بويىنشا كەلىسىمگە كەلىپ، ورتاق حاتتاماعا قول قويدى. قىرعىز دەلەگاتسياسىن باستاپ بارعان ۆيتسە- پرەمەر جەڭيش رازاكوۆتىڭ ايتۋىنشا، وندا شەكارا اۋماعىنداعى داۋلى جەرلەردى انىقتاپ، قۇقىقتىق مارتەبەسىنە باعا بەرۋ، قاجەت بولعان جاعدايدا جەر الماسۋ، شەكارالىق اۋماقتا باقىلاۋدى كۇشەيتۋ، شەكاراعا جاقىن جەردەگى ەلدى مەكەندەردە باقىلاۋ كامەرالارىن ورناتۋ سياقتى پۋنكتەر بار.

​حاتتاماعا سايكەس، ەكى جاق تا وسى التى پۋنكتىنىڭ ورىندالۋىنا جاۋاپتى بولماق. تاجىكستاننىڭ ۆيتسە- پرەمەرى ازيم يبروحيم كەلىسسوزدىڭ ناتيجەلى وتكەنىن ايتىپ، «جەر الماسۋ ارقىلى شەكارا ماسەلەسى شەشىلەدى» دەپ ايتقان.

بۇعان دەيىن ەكى مەملەكەت دەلەگاتسيالارى شەكارا ماسەلەسىنە بايلانىستى كەمىندە 20 رەت كەزدەسكەن. تەحنيكالىق توپ 34 ءىرى ماسشتابتى توپوگرافيالىق كارتا ازىرلەگەن.

قىرعىز- تاجىك شەكاراسىنىڭ ۇزىندىعى 970 شاقىرىمنان استام. ونىڭ 60 پايىزىنا عانا دەليميتاتسيا جانە دەماركاتسيا جۇمىستارى جۇرگىزىلگەن. ەكى مەملەكەت اراسىندا 70 شاقتى انىقتالماعان داۋلى اۋماق بار، وندا بىرنەشە ەلدى مەكەن ورنالاسقان.

شەكارانىڭ كەلىسىلمەگەن تۇستارى سونداعى ەلدى مەكەندەردەگى سۋ، جەر جانە ءالى انىقتالماعان شەكارانى كەسىپ ءوتۋ ماسەلەلەرى داۋعا ءجيى سەبەپ بولادى. داۋدىڭ سوڭى جانجالعا ۇلاسىپ، تاراپتار ءبىر- بىرىنە تاس اتادى، كەيدە قارۋدان وق اتادى.

2019 -جىلى قىرعىز- تاجىك شەكاراسىندا كەمىندە ون جانجال بولعان. ءتورت جاعدايدا ادام ولگەن. قىركۇيەك ايىندا بولعان قاقتىعىستان بىرنەشە ادام قازا تاپتى.

https://www.azattyq.org

سوڭعى جاڭالىقتار