تاڭعى التىدا تۇرۋدىڭ التى سەبەبى
بەلگىلى بلوگەر ەگوزا ەيحا 2 جىل بويى تاڭعى التىدا تۇرىپ كەلەدى. بۇگىن ول ەرتە تۇرۋدىڭ ەرەكشە اسەرلەرىن ءبولىسۋدى ءجون كورىپ وتىر. ەندەشە تاڭعى التىدا تۇرۋدىڭ التى سەبەبىمەن تانىس بولىڭىزدار.
1. ءوز- ءوزىڭىزدى رەتتەۋگە ۋاقىت بولادى
كوپ ادامنىڭ كۇندەلىكتى ءبىر ءتارتىبى بولماعاندىقتان، العا قويعان ماقساتتارىن جۇزەگە اسىرا الماي جاتادى. ەگەر كۇنىڭىزدىڭ تەڭ جارتىسى ۇيقىمەن وتسە، وندا ءسىز ءوز ماقساتىڭىزدى ويىڭىزعا دا الماۋىڭىز مۇمكىن. وزدەرىڭىز بىلەتىندەي كۇننىڭ ءبىرىنشى جارتىسىندا ءسىزدىڭ ميىڭىز جاقسى جۇمىس ىستەيدى. سوندىقتان سول ۋاقىتتى ومىرىڭىزگە پايدالى نارسەلەرگە ارناعان دۇرىس.
2. كۇنىڭىزدى جوسپارلاۋعا ۋاقىت بولادى
ەگەر جۇمىسقا بارماستان بۇرىن كۇنىڭىزدى جوسپارلاپ الساڭىز، وندا ۋاقىتىڭىزدى دا ءتيىمدى پايدالاناسىز. قۇردان- قۇر ۋاقىت وتكىزبەي، وزىڭىزگە تيەسىلى نارسەلەرمەن اينالىسۋعا مۇمكىندىك الاسىز. سول سەبەپتى ەرتەڭگى كۇنىڭىزدى ۇيىقتار الدىندا جوسپارلاپ قويعانىڭىز ابزال. ال شارشاعان كەزدە ءسىزدىڭ ويلاۋعا دا مۇرشاڭىز بولمايتىنىن ۇمىتپاڭىز.
3. تاڭەرتەڭ ءوز- وزىڭىزگە ۋاقىت بولە الاسىز
ۇيقىدان تۇرعان بويدا كەڭسەگە اسىعۋدىڭ قاجەتى جوق. ەگەر ساعات التىدا تۇراتىن بولساڭىز، جۇمىس باستالعانعا دەيىن بىرنەشە ساعات ۋاقىتىڭىز بولادى. ال ول ۋاقىتتى ءتيىمدى پايدالانىپ، سپورتپەن شۇعىلدانۋعا، باسقا زاتتارمەن اينالىسۋعا دا مول مۇمكىندىك الا الاسىز. ەستەرىڭىزگە سالا كەتەيىك، ەرتە تۇرىپ جاتتىعۋ جاساعان ادامنىڭ اعزاسىنا ەندورفين گورمونى بولىنەدى. ول ادامدارعا ەرەكشە كۇش- جىگەر بەرىپ، كۇنى بويى كوڭىلدى جۇرۋگە كومەكتەسەدى.
4. تاڭعى اسىڭىزدى ءىشىپ شىعاسىز
تاڭعى استى تاستاۋعا بولمايتىنىن ءبارىمىز جاقسى بىلەمىز. ەگەر وقۋعا نەمەسە جۇمىسقا بىرەر ساعات بۇرىن تۇرساڭىز، وندا مىندەتتى تۇردە ۇيىڭىزدەن تاڭعى اس ءىشىپ شىعىڭىز. دجون حوپكينس ۋنيۆەرسيتەتىنىڭ جانىنان اشىلعان بلۋمبەرگ دەنساۋلىق ساقتاۋ مەكتەبى تاڭعى استىڭ ادام دەنساۋلىعىنا پايداسى مول ەكەنىن ايتادى. ال تاڭعى اسىڭىزدى تاستاپ كەتسەڭىز، ەش نارسەگە زاۋقىڭىز سوقپاي، كۇنى بويى كوڭىلسىز جۇرەسىز.
5. تابىستى ادامداردىڭ كوبى ەرتە تۇرادى
New York Magazine جۋرنالى ءوزىنىڭ ءبىر ماقالاسىندا وقىرماندارعا Twitter الەۋمەتتىك جەلىسىن قۇراۋشى دجەك دورسي تۋرالى ايتقان بولاتىن. ول ءوز جۇمىس كۇنىن تاڭعى 5:30 دا تۇرىپ باستايدى ەكەن. سول سەكىلدى Apple كومپانياسىنىڭ باس ديرەكتورى تيم كۋك تاڭعى 4:30 دا تۇرىپ، ارىپتەستەرىنىڭ ەلەكتروندى حاتتارىنا جاۋاپ جازاتىن بولعان. ال ايگىلى Virgin Group- ءتىڭ نەگىزىن قالاۋشى ريچارد برەنسون Business Insider باسپاسىنا بەرگەن سۇحباتىندا 5:45 تە تۇرىپ، جۇمىسقا كىرىسەتىنىن ايتتى.
6. بارىنەن 2 قادام الدا جۇرەسىز
ەرتە تۇرۋدى ادەتكە اينالدىرساڭىز، وزىڭىزگە دەگەن سەنىم قالىپتاسا باستايدى. ءسىزدىڭ قانشاما باسەكەلەستەرىڭىز ۇيىقتاپ جاتقاندا ءسىز ءبىراز نارسە تىندىرىپ ۇلگەرەسىز. تاڭعى سەگىزگە دەيىن بارلىق جايسىز جاعدايدى شەشىپ قويساڭىز، كۇنىڭىز كەرەمەت وتەتىنىنە كۇمانىڭىز دە بولماسىن. سونىمەن قاتار ءسىزدى ەشقانداي سترەسس، دەپرەسسيا سەكىلدى سارى ۋايىمعا سالىناتىن زاتتار مازالامايدى.
تاعى ءبىر ەسكەرە كەتەتىن جايت، ەگەر كۇندەگى ۋاقىتتان ەكى جارىم ساعات بۇرىن ەرتە تۇرساڭىز، كۇنىنە 150 مينۋت جۇمىس ۋاقىتىن ۇتاسىز. ال ول دەگەنىمىز اپتاسىندا 17 جارىم ساعات، ايىنا - 70 ساعاتتان استام ۋاقىت، جىلىنا - 840 ساعات. تاڭداۋ وزىڭىزدە!