ازاماتتاردىڭ شاعىمدارى بويىنشا ناقتى شەشىمدەر بيۋروكراتياسىز قابىلدانۋى ءتيىس - مەملەكەت باسشىسى
بۇل تۋرالى اقوردادا پرەزيدەنتتىك كادر رەزەرۆىنە كىرگەن جاستارمەن كەزدەسۋدە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ءۇشىنشى قاعيدا - ازاماتتاردىڭ سۇرانىستارىنا جەدەل ءۇن قاتۋ. قازاقستاندىقتاردىڭ شاعىمى، ءوتىنىشى نەمەسە جۇگىنۋلەرىن جەدەل قاراۋ قاجەت. ولار بويىنشا ناقتى شەشىمدەر بيۋروكراتياسىز قابىلدانۋى ءتيىس»، - دەدى مەملەكەت باسشىسى.
ق ر پرەزيدەنتىنىڭ اتاپ وتۋىنشە، تاياۋ جىلدارى مەملەكەتتىك باسقارۋ جۇيەسىندە بيۋروكراتيالىق پروتسەستەردىڭ باسىم بولىگى اۆتوماتتاندىرىلاتىن بولادى.
«ياعني، بەلگىلى ءبىر دەڭگەيدە بۇل سىزدەردىڭ جۇمىستارىڭىزعا دا بايلانىستى بولماق. مەملەكەتتىك سەكتور بلوكچەين، بيگداتا، جاساندى ينتەللەكتى قۇرالدارىن پايدالانا باستايدى. وسىناۋ تەحنولوگيالارعا نەگىزدەلگەن مەملەكەتتىك جۇيە قوعام ماسەلەلەرىنە الدىن الا ارەكەت ەتۋگە جانە وزەكتى الەۋمەتتىك پروبلەمالاردى دەر ۋاقىتىندا شەشۋگە مۇمكىندىك بەرەدى. بۇل بەلگىلى ءبىر دەڭگەيدە ەرتەڭگى ەمەس، بۇگىنگى كۇننىڭ شىندىعى. ءبىراق، وكىنىشكە وراي مەملەكەتتىك قىزمەتشىلەردىڭ بارلىعى بىردەي مۇنى تۇسىنە قويعان جوق»، - دەدى قاسىم-جومارت توقايەۆ.