مەملەكەت باسشىسى رەزەرۆكە الىنعان جاستارعا ءاليحان بوكەيحاننىڭ قاناتتى ءسوزىن جادىندا ۇستاۋعا كەڭەس بەردى
بۇل تۋرالى اقوردادا پرەزيدەنتتىك كادر رەزەرۆىنە كىرگەن جاستارمەن كەزدەسۋدە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ءبىزدىڭ ماقساتىمىز سىزدەردى لاۋازىمدى قىزمەتكە تاعايىنداۋ دەپ ويلاماڭىزدار. بۇل ەلدى وركەندەتۋگە بەل بۋعان، سول ءۇشىن بار كۇش- جىگەرىن جۇمسايتىن ازاماتتارعا ارنالعان جوبا. باستى مىندەت - تالانتتى جاستاردىڭ قازاقستاندى جاڭا بەلەستەرگە كوتەرۋىنە مۇمكىندىك بەرۋ. ەڭ باستىسى تۋعان ەلىڭدى شەكسىز قادىرلەۋ، وعان ادال قىزمەت ەتۋ. تاباندى ەڭبەك ەتىپ، ناقتى ناتيجەگە قول جەتكىزۋ كەرەك. بۇل ۇلتتى جاڭعىرتۋ ءۇشىن وتە ماڭىزدى»، - دەدى قازاقستان پرەزيدەنتى.
مەملەكەت باسشىسى بۇگىنگى كەزدەسۋگە قاتىسۋشىلار ارقىلى ەلىمىزدە پاتريوتتاردىڭ جاڭا بۋىنى قالىپتاسادى دەپ سەنەتىندىگىن باسا ايتتى.
«سىزدەر ەگەمەن ەلىمىزدىڭ جاستارىنا ۇلتجاندىلىقتىڭ، وتانشىلدىقتىڭ وزىق ۇلگىسىن كورسەتۋلەرىڭىز كەرەك. كەزىندە الاش ارداقتىسى ءاليحان بوكەيحان: «ۇلتقا قىزمەت ەتۋ بىلىمنەن ەمەس مىنەزدەن» دەپ ايتقان. بۇل ەشقاشان وزەكتىلىگىن جوعالتپايتىن، ۋاقىت وتكەن سايىن ءمان-ماڭىزى ارتا تۇسەتىن قاناتتى ءسوز»، - دەدى قاسىم-جومارت توقايەۆ.