سەناتورلار ايماقتاعى كادر تاپشىلىعىنا الاڭداۋشىلىق ءبىلدىردى

ءبورلى. قازاقپارات - سەناتورلار وڭىرلەردەگى دارىگەر جەتىسپەۋشىلىگى، نارەستەلەردىڭ دەر كەزىندە تەكسەرىلمەۋى مەن اۋرۋدىڭ الدىن الۋ ماسەلەلەرىنە الاڭداۋشىلىق ءبىلدىردى، دەپ حابارلايدى قازاقپارات سەناتتىڭ باسپا ءسوز قىزمەتىنە سىلتەمە جاساپ.

پارلامەنت سەناتىنىڭ دەپۋتاتتارى ەربولات مۇقايەۆ پەن ناريمان تورەعاليەۆ باتىس قازاقستان وبلىسىنىڭ ءبورلى اۋدانىندا بولىپ قايتتى.

پارلامەنتشىلەر اۋداندىق اۋرۋحانادا مەديتسينالىق قىزمەتتىڭ جاي- كۇيىمەن تانىستى. سەناتورلار سابيلەردىڭ دەر كەزىندە تەكسەرىلمەۋىنە جانە اۋرۋدىڭ الدىن الۋ شارالارىنىڭ كەنجە قالىپ وتىرعانىنا الاڭداۋشىلىق ءبىلدىردى. كەيىنگى جىلدارى بالالاردىڭ سويلەۋ مەن ەستۋ قابىلەتىنىڭ بۇزىلۋى بايقالىپ وتىر. دارىگەرلەر ونى اتا- انالاردىڭ جۇمىسباستى بولىپ، بالالاردى دەر كەزىندە تەكسەرۋ مەن سپورتتىق دامۋىنا نازار اۋدارماۋىنا بايلانىستى ەكەنىن ايتتى. اۋداندا سالماعى اۋىر بالالار مەن ەرەسەكتەر سانى ارتىپ كەلەدى.

دارىگەرلەر قاۋىمى قازىرگى كەزدە اۋداندا ءتۇرلى ماماندىقتاعى 15 دارىگەر جەتىسپەيتىنىن جەتكىزدى.

«كادر تاپشىلىعى باسقا ايماقتارداعى سياقتى 25 پايىزدىق اۋىلدىق جەڭىلدىكتەردىڭ بولماۋىنا بايلانىستى بولىپ وتىر. اۋدان ورتالىعىندا سونىمەن قاتار جەكە مەديتسينالىق كلينيكالار دا بار. جوعارى بىلىكتى ماماندار كوبىرەك جالاقى ۇسىناتىن مەكەمەلەرگە كەتەدى»، - دەيدى بيۋدجەت سالاسىنىڭ قىزمەتكەرلەرى.

دەپۋتاتتار مۇمكىندىگى شەكتەۋلى بالالار ماسەلەسىن دە نازاردان تىس قالدىرعان جوق. اۋرۋحانا جانىنداعى وڭالتۋ ورتالىعىندا ورتالىق جۇيكە جۇيەسى بۇزىلعان 40 بالا ەسەپتە تۇر، مامانداردىڭ كومەگىمەن ولاردىڭ جارتىسى ءوز بەتىنشە وتىرۋدى ۇيرەندى.

سەناتورلار پەداگوگتارمەن كەزدەسۋ بارىسىندا قازاقستان رەسپۋبليكاسىنىڭ ءبىلىم جانە عىلىم سالاسىن دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسىن جانە «پەداگوگ مارتەبەسى تۋرالى» جاڭا زاڭدى تالقىلادى.

وقىتۋشىلار بالاباقشالارداعى تالىمگەر تاربيەشىلەرگە مەكتەپتەگى تالىمگەرلىككە ۇقساس قوسىمشا اقى تولەۋدى ۇسىندى. ن. تورەعالييەۆ بۇل ماسەلە باقىلاۋعا الىنعانىن جانە سالالىق مينيسترلىكتەر وكىلدەرىمەن تالقىلاناتىنىن اتاپ ءوتتى. پەداگوگتار سونىمەن قاتار مەكتەپ، بالاباقشا باسشىلارىنىڭ ەڭبەكاقىسى تۋرالى ماسەلەلەردى دە كوتەردى. سەناتور ءبىلىم بەرۋ مەكەمەلەرى باسشىلارىنىڭ جالاقىسى 2020 -جىلدان باستاپ كوتەرىلەتىنىن، سونداي-اق 2022 -جىلدان باستاپ باسقارۋ شەبەرلىگى ءۇشىن قوسىمشا اقى تولەۋ جوسپارلانعانىن ءتۇسىندىردى.

اۋدان اكتيۆىمەن كەزدەسۋ بارىسىندا جاڭا سيپاتتاعى اتاۋلى الەۋمەتتىك كومەككە قاتىستى جاڭالىقتاردى، زورلىق- زومبىلىق پەن مال ۇرلىعى ءۇشىن جاۋاپكەرشىلىكتى قاتاڭداتۋعا قاتىستى قىلمىستىق كودەكسكە ەنگىزىلگەن تۇزەتۋلەر ءتۇسىندىرىلدى.

اۋدان تۇرعىندارى تاراپىنان كەڭتۇبەك اۋىلىنىڭ مارتەبەسىن انىقتاۋ، جارسۋات اۋىلى ايماعىندا جايىق وزەنىنىڭ جاعاسىن نىعايتۋ، مەملەكەتتىك قىزمەتكەرلەردىڭ جالاقىسىن كوتەرۋ جانە تاعى باسقا ماسەلەلەر كوتەرىلدى.