وسكەمەندە تاپانشامەن كەلىپ، دۇكەننەن اراق سۇراعان ادام ۇستالدى

وسكەمەن. قازاقپارات - وسكەمەن قالاسىنىڭ پوليتسەيلەرى دۇكەن ساتۋشىسىنا ويىنشىق تاپانشا كەزەگەن ەر ادامدى ۇستادى، دەپ حابارلايدى قازاقپارات.

«10-قاڭتار كۇنى ساعات 15.35-تە «102» ارناسىنا قوڭىراۋ شالعان ساتۋشى مەديتسينالىق ماسكا كيگەن بەلگىسىز بىرەۋدىڭ ءوزىن تاپانشاعا ۇقسايتىن زاتپەن قورقىتىپ، ءبىر بوتەلكە اراق سۇراعانىن ايتتى. ايەل ادام قورعانۋ ماقساتىندا ونىڭ بەتىنە گاز باللون شاشىپ جىبەرگەن. مۇندايدى كۇتپەگەن توناۋشى سول جەردەن قاشىپ كەتكەن» - دەپ حابارلادى وسكەمەن قالالىق پوليتسيا باسقارماسىنىڭ باسپا ءسوز قىزمەتى.

جەدەل ارەكەت ەتكەن ءتارتىپ ساقشىلارى كوپ ۇزاماي كۇدىكتىنى قولعا ءتۇسىردى. بۇرىن سوتتى بولعان وسكەمەن قالاسىنىڭ 25 جاستاعى تۇرعىنى ءوز كىناسىن مويىندادى.

«ونىڭ دۇكەن ساتۋشىسىنا كەزەگەن تاپانشاسى ويىنشىق بولىپ شىقتى. قازىرگى ۋاقىتتا ق ر ق ك-نىڭ 191-بابى (توناۋ) بويىنشا تەرگەۋ امالدارى جۇرگىزىلۋدە» - دەلىنگەن مالىمەتتە.

تالعاتجان مۇحامەتبەك ۇلى