جامبىل وبلىسىندا مالعا قاسقىر شابۋ وقيعالارى جيىلەپ كەتتى
جەرگىلىكتى شارۋالار «ءتورت تۇلىكتى قىناداي قىرعان قاسقىرلارمەن كۇرەسۋگە دارمەنسىزبىز»، دەيدى. ويتكەنى ءتۇز تاعىسىن ءوز بەتىمەن اتۋعا رۇقسات جوق. قوراسىن قورىپ، قورقىنىشتا وتىرعان مالشىلار ەندى جەرگىلىكتى بيلىكتەن كومەك سۇراپ وتىر. قاسقىردان قورلىق كورىپ وتىرعان شارۋالاردىڭ ءبىرى - نۇرباقىت سەيتقالي. قىس تۇسكەلى ونىڭ قوراسىنا جىرتقىش بىرنەشە رەت شابۋىل جاساپ، 15 شاقتى قويىن جەپ كەتكەن. قازىر كەزەكپەن ۇيىقتاپ، تۇنىمەن قورا كۇزەتەدى. وتكەن ءتۇنى عانا مال تۇياعىنىڭ ءدۇبىرىن ەستىپ، قاسقىردىڭ كەلگەنىن سەزىپتى.
رۋسلان باقىتبەك ۇلى، ءتىلشى:
- مىنە، كەشە عانا ءتۇز تاعىسى تۇسكەن وسى قورا. جىرتقىش اڭ مىنە، مىناداي قورانىڭ بيىك قورشاۋىنا قاراماستان ىشكە وڭاي كىرىپ ءبىر تۇندە جۇزدەن استام قويدى قىرىپ كەتە جازدادى. ابىروي بولعاندا قوجايىنى ۇيدەن شىعىپ مىلتىق اتىپ ۇلگەرگەن. سونىڭ وزىندە قاسقىر بىرنەشە قوي مەن ەشكىنى تارتىپ كەتكەن.
نۇرباقىت سەيىتقالي، شارۋا:
- ەندى امال جوق، وسىلاي تالاپ كەتەدى. ودان كەيىن سويىپ الامىز، باسقا ەشتەڭە ىستەمەيمىز وعان. قويا بەرگەننىڭ ءوزى بولمايدى. سويىپ الامىز قازىر. شىقپاعاندا ءبارىن قىرىپ كەتۋ كەرەك ەدى. قورا جابىق اينالا، قاشىپ كەتە المايدى مالدار. تاماقتاپ، باۋىزداپ كەتە بەرەدى. كەيبىرەۋلەرى ارقاسىنا سالىپ الىپ كەتەدى.
شالعايداعى شارۋالاردىڭ كوپشىلىگى قازىر ۇرەيدە. جۋىردا تالاس اۋدانىنداعى مايتوبە اۋىلىنىڭ ماڭىندا بىرنەشە جىلقى يت- قۇسقا جەم بولعان. قاسقىردى الۋ وڭاي شارۋا ەمەس. ال، اڭدى اتۋعا زاڭمەن تىيىم سالىنعان.
«سوندىقتان بۇل جۇمىستارعا اڭشىلىق شارۋاشىلىقتارى جۇمىلسا يگى» ، دەيدى جۇرت. سارسەكۇل ستامبەكوۆا، ورنەك اۋىلىنىڭ تۇرعىنى:
- بيلىكول دەگەن كولىمىز بار. مىنا مۇز قاتقاندا مىنا تاۋدان كەلەدى، اسىرەسە. سودان كەيىن بيلىكولدىڭ ارعى جاعىندا فازەندا بار. قىركۇيەكتە 60 باس مالىن قىرىپ كەتتى. وسىلاي كەلەدى دە، ءولدى دەگەندە 15 باستاي، كەشە بىرەۋىن تاماقتاپ كەتتى. باعانا قۇيرىعىن جۇلىپ كەتتى. ونى مال بولاتىن شىعار دەسەك، بولمايدى، اياعىن سىندىرىپ كەتكەن. ماماندار قوراعا تۇسكەن قاسقىردى اتۋعا بولادى دەپ وتىر. تەك ارنايى جۇمىس توبى ول دەرەكتى تىركەۋى ءتيىس ەكەن. جاقىندا قاسقىر سانىن رەتتەۋ ءۇشىن كوميسسيا قۇرىلىپ، اتۋعا رۇقسات بەرىلگەن. قازىر ءوڭىردى مەكەن ەتەتىن اڭنىڭ %40 ءىن اتۋعا رۇقسات بار.
بولات اسانبەكوۆ، جانۋارلار دۇنيەسىن قورعاۋ اۋماقتىق ينسپەكتسياسى باسشىسىنىڭ ورىنباسارى:
- ال وسى جىلى قاسقىردىڭ شارۋاشىلىق مالدارىنا شابۋىلى كوبەيگەنىنە بايلانىستى رەسپۋبليكا دەڭگەيىندە وسى ماسەلە كوتەرىلىپ جاتىر. بۇل بويىنشا جۇمىس توبى قۇرىلعان. جەرگىلىكتى اتقارۋشى ورگان بار، ينسپەكتسيا بار، ماماندارى قاسقىر شابۋىلىنىڭ الدىن الۋ ءۇشىن جينالىس جاساپ ءجۇرمىز. بيىل ساناق بويىنشا ايماقتاعى قاسقىرلاردىڭ سانى ەكى مىڭعا جۋىق دەپ ەسەپتەلگەن. ماماندار ەندى جىرتقىش شەكتەن تىس كوبەيىپ كەتكەن ەلدى مەكەندەردى انىقتايدى.
www.24.kz