اس ءۇي پىشاعىن قولدانۋدىڭ قاتەلىكتەرى

نۇر-سۇلتان. قازاقپارات -  ءار اس ءۇي حانشايىمى تاماق دايىنداۋداعى باستى قۇرال پىشاق ەكەنىن بىلەدى.

ءبىراق ونى دۇرىس قولدانباسا نەمەسە ساقتاماسا، ول باستاپقى كەزدەگى وتكىرلىگىن جوعالتىپ، جىلدام جارامسىز زاتقا اينالادى. نازارىڭىزعا پىشاقتى قولدانۋدا ءجيى جىبەرەتىن قاتەلىكتەردى ۇسىنامىز.

 1. دۇرىس ساقتاماۋ كوپشىلىك پىشاقتاردى جاشىكتە، تارتپادا ساقتايدى. ءبىراق جاشىكتە ولاردىڭ جۇزدەرى ءبىر- بىرىنە سۇيكەنەدى، ال بۇل ولاردىڭ وتكىرلىگى مەن جارامدىلىق مەرزىمىنە نەگاتيۆ اسەر ەتەدى. پىشاق ساقتاۋدىڭ قولايلى ادىستەرى -  ارنايى تىرەۋىش الۋ نەمەسە قابىرعاعا بەكىتىلگەن ماگنيت جولاق ورناتۋ.

 2. ىدىس جۋاتىن ماشيناعا سالۋ پىشاقتى ىدىس جۋاتىن ماشيناعا باسقا ىدىستارمەن بىرگە سالماي، بولەك شايىپ، جۋعان ءجون. تەحنيكانىڭ جۇمىسى پىشاق ءجۇزىنىڭ وتكىرلىگىن ناشارلاتۋى نەمەسە سىندىرىپ جىبەرۋى مۇمكىن. سونداي- اق پىشاق ونداعى باسقا ىدىستارعا زاقىم كەلتىرۋى دە ابدەن مۇمكىن. سونىمەن قاتار، پىشاقتاردى سۋعا سالىپ قويۋعا نەمەسە قاتتى ىستىق سۋعا جۋۋعا دا بولمايدى.

 3. كارتون قوراپتى كەسۋ نەمەسە كونسەرۆىلەنگەن قۇتىنى اشۋ كوپشىلىك اس ءۇي پىشاعىمەن كارتون قوراپتى (مىسالى، ءسۇتتىڭ قورابىن) كەسە سالادى نەمەسە كونسەرۆىلەنگەن قۇتىنى اشادى. بۇل ارەكەتىڭىزبەن پىشاقتىڭ ءجۇزىن قۇرتاسىز. سونداي- اق گيگيەنا ەرەجەسى تۋرالى ۇمىتپاڭىز: اس ءۇي پىشاعى تەك تاماق دايىنداۋعا قولدانىلىپ، تازا بولۋى كەرەك. سكوتچپەن ورالعان قوراپتى اشامىن دەپ اس ءۇي پىشاعىن قولدانا سالماڭىز.

 4. نان كەسۋ امبەباپ اس ءۇي پىشاعىن نان كەسۋگە قولدانباڭىز. وتكىر پىشاعىڭىزدى نان كەسۋگە ءجيى قولدانساڭىز، كوپ ۇزاماي ونىڭ ءجۇزىنىڭ ناشارلاعانىن بايقايسىز. سوندىقتان نان كەسۋگە ارنالعان پىشاق الىپ، وتباسى مۇشەلەرىن دە ەسكەرتىپ قويىڭىز.

 5. تۋرالعان كوكونىستەردى پىشاق جۇزىمەن ىسىرىپ سالۋ ازىق- تۇلىكتى تاقتايعا تۋراپ، ونى پىشاقتىڭ جۇزىمەن ىدىسقا ىسىرىپ سالۋ ارقىلى ونىڭ ءجۇزىن ناشارلاتاسىز. تۋرالعان تاماقتى پىشاقتىڭ وتكىر ەمەس جاعىمەن ىسىرىپ سالىڭىز.

Massaget.kz