ماس كۇيىندە كولىك ايداعان الماتىلىقتار جازاعا تارتىلۋدا

الماتى. قازاقپارات - الماتىدا ماس كۇيىندە رۋلگە وتىرعان جۇرگىزۋشىلەر كولىك باسقارۋ قۇقىعىنان ايرىلىپ، قاماۋعا الىنۋدا، دەپ حابارلايدى قازاقپارات ءتىلشىسى.

الماتىدا تۇنگى رەيد شارالارى باستالدى. شۇعىل- پروفيلاكتيكالىق شارالار بارىسىندا اراق، ەسىرتكى جانە ءتۇرلى توكسيكولوگيالىق زاتتار پايدالانىپ، كولىك ايداعان جۇرگىزۋشىلەر ۇستالىپ جاتىر.

«تۇنگى كەزەكشىلىك كەزىندە تۇركسىب اۋدانىندا Nissan كولىگىن تىزگىندەگەن جۇرگىزۋشى توقتاتىلدى. 44 جاستاعى ەر ادام ماس بولعان. مەديتسينالىق تەكسەرۋ كەزىندە ونىڭ ەسىرتكى پايدالانعانى دا راستالدى. اكىمشىلىك حاتتاما تولتىرىلدى. ال المالى اۋدانىندا ماس كۇيىندە كولىك ايداعان 22 جاستاعى جىگىت ۇستالدى. مەديتسينالىق تەكسەرۋدەن وتۋدەن باس تارتقانى ءۇشىن ول اكىمشىلىك جازاعا (ايىپپۇل) تارتىلدى. مەدەۋ اۋدانىندا سىرا زاۋىتىندا جۇمىس جاسايتىن جۇرگىزۋشى ورتا دەڭگەيلى دارەجەدە ماس كۇيىندە كولىك تىزگىندەگەنى انىقتالدى. الماتى اۋدانارالىق اكىمشىلىك سوتىنىڭ قاۋلىسىمەن رەيد كەزىندە ۇستالعان جۇرگىزۋشىلەردىڭ بارلىعى اكىمشىلىك ءىس بويىنشا ايىپتى دەپ تانىلىپ، 7-8 -جىلعا كولىك ايداۋ قۇقىعىنان ايرىلدى، سونداي- اق 15 تاۋلىككە قامالدى» ، - دەدى پوليتسيا دەپارتامەنتىنىڭ باسپا ءسوز قىزمەتىنەن.