تالعات تەمەنوۆ: ابايدى تۇسىرەتىن ادام قالماعان با؟
Sputnik قازاقستان ءتىلشىسى تانىمال قازاق رەجيسسەرلەرىنىڭ وسى باستاماعا قاتىستى پىكىرىن سۇراپ ءبىلدى.
«ابايدىڭ التى نۇسقاسى بار»
رەجيسسەر تالعات تەمەنوۆتىڭ ويىنشا، اباي تۋرالى سەريالدى تالانتتى ادام ءتۇسىرۋى كەرەك. قازاقتىڭ ءداستۇرىن، مادەنيەتىن، ادەبيەتىن، ال، ەڭ باستىسى، اباي ءومىر سۇرگەن زاماننىڭ ەگجەي-تەگجەيىن بىلەتىن مامان بولۋى شارت.
«بىزدە ەكرانعا شىققان ابايدىڭ التى نۇسقاسى بار. ءبىراق، شىن مانىندە، قاليبەك قۋانىشبايەۆ سومداعان وبرازى بولماسا، كەيىن ابايدىڭ ەكرانداعى باعى جانبادى»، - دەدى تەمەنوۆ Sputnik قازاقستان تىلشىسىنە بەرگەن سۇحباتىندا.
ونىڭ ويىنشا، جاڭا جوبانى شەتەلدىك ماماندارعا بەرۋگە بولمايدى. سەبەبى ولار قازاقتىڭ مادەنيەتىن تۇسىنبەيدى.
«مىسالى، مەن كەشە عانا «قازاق فيلم» كينوستۋدياسىنا بارىپ، رەسەيلىك كينورەجيسسەر ەگور كونچالوۆسكيدىڭ «اباي» وپەراسىن تەلەنۇسقاعا تۇسىرەتىنىن ەستىدىم. ەگور قازاقتىڭ مادەنيەتى تۇرماق ءتىلىن دە بىلمەيدى عوي. ول سپەكتالدى قالاي تۇسىرەدى؟ ەندى بۇنى كىمنىڭ شەشىپ جاتقانىن تۇسىنبەيمىن. سوندا ابايدى تۇسىرەتىن ادام قالماعان با؟»، - دەيدى تەمەنوۆ.
رەجيسسەردىڭ ايتۋىنشا، توقايەۆتىڭ تاپسىرماسىن ورىنداي الاتىن وتاندىق ماماندار از ەمەس. ابايدىڭ ءرولىن سومداپ بەرەتىن اكتەر دا بار. ءبىراق، ەڭ الدىمەن، رەجيسسەردى دۇرىس تاڭداۋ قاجەت. سوندا ول وبرازدى دا اشادى. رەجيسسەر ابايعا جاقىن بولىپ، ابايدىڭ فيلوسوفياسىن ءتۇسىنۋى كەرەك.
ءبىر ءبولىم - 1 ميلليون دوللار
رەجيسسەر دوسحان جولجاقسىنوۆ كەزىندە قۇنانبايدىڭ ءرولىن سومداعان. ونىڭ ايتۋىنشا، ابايدىڭ وبرازىن اشۋ وڭاي ەمەس. دەگەنمەن، جاڭا جوبانى ويداعىداي جاساۋعا بولادى.
«اباي تۋرالى سەريال تۇسىرەتىن بولسا، سەناريگە بايگە جاريالاۋ قاجەت. وسىنى مىندەتتى تۇردە جاساعان دۇرىس. سەناري مەن بىرگە رەجيسسەردى قوسا تاڭداۋ كەرەك. ويتكەنى ول سەناريمەن بىرگە بىتە قايناۋى قاجەت. بۇل - نەگىزگى شارت»، - دەيدى جولجاقسىنوۆ.
وسى ورايدا ول بارلىق رەجيسسەرگە ورتاق ءبىر ادەتتى ەسكە الدى. ولار فيلمدى باس كەيىپكەردىڭ بالا كەزىنەن باستايدى.
«مەنىڭشە، بۇل - ۋاقىتتى الاتىن مانيپۋلياتسيا. رەجيسسەرلەر كورەرمەننىڭ كوزقاراسىن قالىپتاستىرامىز دەپ، بالا كەزىنەن باستايدى دا، نەگىزگى كەزەڭگە كوپ سالماق سالمايدى. ال ابايعا كەلگەندە ونىڭ وڭ- سولىن تانىعان كەزەڭىن العان دۇرىس سياقتى. سوعان باسىمدىق بەرگەنىمىز ءجون. فيلم ەسەپ ءۇشىن تۇسىرىلمەۋى كەرەك»، - دەپ اتاپ كورسەتتى جولجاقسىنوۆ.
رەجيسسەر تەلەحيكايانىڭ ءبىر بولىمىنە 1 ميلليون دوللاردان ءبولىنۋى كەرەك دەپ سانايدى. ونسىز ساپالى دەكوراتسيا مەن كيىم- كەشەك جاساۋ مۇمكىن ەمەس.
«ەندى، ءبىز «ءبىرجان سال» مەن «قۇنانبايدا» نە تۇسىرىلگەنىن بىلەمىز عوي. ۇيالاتىن جەرلەر بار. ۇيالاسىڭ دا، اھ ۇراسىڭ. «قايران، قازاعىم-اي» دەگىڭ كەلەدى. قۇرال-جابدىقتىڭ ءبارى قارجىنى تالاپ ەتەدى. ال اكتەر تاڭداعاندا «ۇقسايدى-اۋ» دەگەن ۇردىسكە سالىنباۋ قاجەت. سوسىن ابايدى باياعىداي ءمۇسىن-ەسكەرتكىشكە اينالدىرماي، مەيىلىنشە جەرگە تۇسىرۋگە تىرىسۋ كەرەك»، - دەپ اتاپ كورسەتتى جولجاقسىنوۆ.
قازاقتىڭ شىن بولمىسىن الەمگە پاش ەتەمىز دەسەك…
رەجيسسەر رۇستەم ابدىراشەۆ تا «اباي تۋرالى سەريال تۇسىرسە دە، دەرەكتى فيلم تۇسىرسە دە، كوپتىك ەتپەيدى» دەپ وتىر. سەبەبى قازاقتىڭ اباي كەزىندەگى تۇرمىس-تىرشىلىگى حالقىمىزدىڭ بولمىسى مەن تابيعاتىن اشىق كورسەتەدى. ال مۇحتار اۋەزوۆ ءوز رومانىنا ۇلتتىق كودىمىزدى ەنگىزىپ كەتتى.
«تەلەسەريال مەن دەرەكتى فيلم ءتۇسىرۋ - بۇل ۇلكەن باستاما. ونى جاقسىلاپ تۇرىپ جاساۋ كەرەك. قوماقتى ەتىپ شىعارعان ءجون. قازاقتىڭ شىن بولمىسىن دۇنيەجۇزىنە پاش ەتەمىز دەسەك، ابايدىڭ زامانى، ابايدىڭ سوزدەرى ارقىلى شىعۋىمىز قاجەت»، - دەيدى ابدىراشەۆ.
وسى ورايدا رەجيسسەر شەتەلدەگى ءبىر جولداسىنىڭ ءسوزىن ەسكە الدى.
«مەنىڭ شەتەلدەگى ءبىر تانىس دوسىم: قازاقتار «ابايدىڭ قارا سوزدەرىن» وقىپ-وقىپ، سونىڭ ارقاسىندا بۇگىندە ساپالى ەلگە اينالىپ وتىر عوي. سەبەبى ءوز كەمشىلىگىن سەزىنە بىلەدى، سونى سىنعا الىپ، تۇجىرىم جاسايدى. ال ابايدىڭ مىقتىلىعى سول، قازاقتىڭ شىنايى وبرازىن كورسەتە ءبىلدى دەپ ايتتى»، - دەيدى ابدىراشەۆ.
رەجيسسەردىڭ ايتۋىنشا، اباي تۋرالى تەلەحيكايانى ساپالى ەتىپ تۇسىرۋگە بولادى. ءبىراق سوعان ساي قارجى ءبولىنۋى شارت.