اقشا ۇنەمدەۋدىڭ سەگىز ءتاسىلى

None
None
نۇر-سۇلتان. قازاقپارات - الەمدىك داعدارىس بارلىق جانۇياعا اسەر ەتەرى حاق.

اينالامىزدا قارىزدان-قارىزعا باتىپ، ءوز داعدارىسىنان شىعا الماي جۇرگەن جاندار قانشاما؟ بىرىنشىدەن، الدىڭىزعا ماقسات قويا ءبىلىڭىز جانە ومىرگە وپتيميستىك كوزقاراسپەن قاراڭىز! ەشقاشان «اقشا جوق!» دەپ ايتپاڭىز. وسى كۇنگە تاۋبە دەپ، تومەندەگى قاعيدالاردى ۇستانىپ جۇرسەڭىز، داعدارىستىڭ ءسىزدى اينالىپ وتەرىنە سەنىڭىز!

شىعىندى الدىن-الا جوسپارلاڭىز

شىعىندارىڭىزدى كۇندەلىكتى جوسپارلاۋ ءسىزدى جالىقتىرىپ جىبەرۋى مۇمكىن، ايتسە دە، بۇل دالاعا شاشىلعان ارتىق اقشانى ازايتۋدىڭ ەڭ ءتيىمدى جولى. بۇل ءتاسىل ارقىلى ويدا-جوقتا جاسالعان ساۋدا مەن ماقساتسىز جۇمسالعان قاراجاتتىڭ قاتارى سيرەيدى. ءارى وسى ادىسپەن اقشانىڭ باسىم بولىگى قايدا كەتەتىنىن ءبىلىپ وتىراسىز.

ساۋدا جاسار الدىندا ويلانىڭىز

الاتىن زاتتارىڭىزدى تىزىمدەپ الىڭىز. ۇيدە نە بار، نە جوعىن انىقتاپ، پاراققا جازىپ الىڭىز. عالامتور ارقىلى ساۋدا جاساۋدى ۇيرەنسەڭىز، تىپتەن جاقسى. سىزگە تەك ءبىر-اق رەت كومەگى تيەتىن زاتتاردى ساتىپ الماس بۇرىن ويلانىڭىز.

زاتتى ەكىنشى ءبىر زاتپەن الماستىرىڭىز

ءبىرىنىڭ ورنىنا ءبىرىن پايدالانۋعا بولاتىن زاتتار تۇرمىستا وتە ءجيى كەزدەسەدى. ماسەلەن، «پاراتسەتامول» ءدارىسى مەن ليمون قوسىلعان شاي «تەرافليۋ» ۇنتاعىنىڭ، سۋپەرماركەتتەن الىنعان پاكەتتەر قوقىس پاكەتتەرىنىڭ ورنىن الماستىرا الادى. وسىنداي جاعدايلاردى ەسكەرسەڭىز، اقشاڭىز قالتاڭىزدا قالاتىنىن ەستەن شىعارماڭىز. كەيبىرى ءسىزدى «جۇمىرتقادان ءجۇن قىرىققان» دەپ ويلاۋى مۇمكىن. دەگەنمەن، اقشا ۇنەمدەۋدىڭ ەشقانداي ۇياتى جوق. بۇل - ۇنەمدەلگەن قاراجاتىڭىزدى ساقتاپ، جازدا دەمالۋىڭىزعا بىردەن- ءبىر مۇمكىندىك.

دەنساۋلىعىڭىزدى كۇتىڭىز

سۋىق كۇنى شاشىمىزدى جۋىپ الىپ، قۇرعاتپاستان دالاعا شىعىپ كەتۋدى دوعارۋ كەرەك. باس كيىم كيىپ، قالىڭ كيىنىپ، قول- اياعىڭىزدى جىلى ۇستاڭىز. اتا- اناڭىز ايتاتىن «سۇلۋىنان جىلۋى» دەگەن قاعيدانى ۇستانساڭىز، ءدارىحاناعا بارىپ، ارتىق شىعىنعا ۇشىرامايسىز. وعان قوسا، وقۋدا نەمەسە قىزمەتتە ءجۇرىپ اۋىرساڭىز، ويعا العان ىستەرىڭىزدىڭ كەيىنگە شەگەرىلىپ قالاتىنىن ۇمىتپاڭىز.

قاراپايىم دۇنيەلەردى ۇيرەنىڭىز

سۋ قۇبىرىنىڭ شۇمەگىنەن اققان سۋدى تىيۋ ءۇشىن اقىلى ارنايى مامانداردى شاقىرۋدىڭ قاجەتى جوق. عالامتوردان نۇسقاۋلىعىن كورۋ ارقىلى تەحنيكالىق كىلتپەن جوندەڭىز. بۇل تەك ءبىر عانا مىسال، قىسقاشا ايتقاندا، ۇيدە بار زاتتى ءتيىمدى پايدالانىڭىز. بۇل سىزگە تەك قانا اقشا ۇنەمدەۋدى ۇيرەتپەيدى، ەپتىلىگىڭىز پەن قولىڭىزدان كەلەتىن ىستەردىڭ سانى ارتادى.

كوممۋنالدىق تولەمدەردى قىسقارتىڭىز

ياعني، تاعى دا ۇنەمدەۋ ءادىسى ارقىلى كوممۋنالدىق تولەمدەردى دە ازايتا الاسىز. جارىقتى قاجەت ەمەس كەزدە ءوشىرىپ ءجۇرۋ، كەشكى استا شىراق جاعىپ، رومانتيكالىق كەش جاساۋ، ت. ب.

ەپتى بولىڭىز

قولدان بۇيىم جاساۋعا قابىلەتىڭىز بولسا، تىپتەن جاقسى. «تەمىردەن ءتۇيىن تۇيگەن» قازاقپىز عوي. بوساعان دۇنيەلەردى كەرى ومىرگە اكەلىپ، قوقىس جاشىگىنە ەمەس، تاعى دا پايداڭىزعا جاراتىڭىز.

دەرەككوز: Reactor

سوڭعى جاڭالىقتار