ۆولەيبول: وليمپياداعا ىرىكتەۋ كەزەڭىندە قازاقستان قىزدارى ءۇشىنشى ورىن الدى

نۇر-سۇلتان. قازاقپارات - بۇگىن ۆولەيبولدان تايلاندتىڭ ناكحونراتچاسيما قالاسىندا ءوتىپ جاتقان ايەلدەر اراسىنداعى توكيو وليمپياداسىنا ىرىكتەۋ كەزەڭىندە قازاقستان قۇراماسى ءۇشىنشى ورىن الدى، دەپ حابارلايدى قازاقپارات ءتىلشىسى.

بۇگىنگى تايۆانمەن كەزدەسۋدە قازاقستاندىق قۇراما جاقسى ويىن ورنەگىن كورسەتە ءبىلدى. العاشقى سەتتە قارسىلاسىنان 25:21 ەسەبىمەن باسىم ءتۇستى. ودان كەيىن تايۆان قىزدارى 25:22 ەسەبىمەن جەڭىپ، جالپى ەسەپتە تارازى باسىن تەڭەستىردى. ءۇشىنشى سەتتە قازاقستاندىق ۆولەيبولشىلار قارسىلاسىن 25:21 ەسەبىمەن تىزە بۇكتىردى. ناتيجەسىندە جالپى ەسەپتە تاعى دا العا شىقتى. سوڭعى سەتتە قازاقستاندىق ۆولەيبولشىلار قارسىلاسىن 27:25 ەسەبىمەن جەڭدى. جالپى ەسەپتە 3:1 ەسەبىمەن باسىم تۇسكەن ولار ىرىكتەۋ كەزەڭىندە ءۇشىنشى ورىن الدى.

قازاقستان قۇراماسى ىرىكتەۋ كەزەڭىندە ۆ توبىندا سىنعا ءتۇستى. الدىمەن يران مەن يندونەزيادان 3:0 ەسەبىمەن باسىم ءتۇسىپ، سوڭعى ويىندا وڭتۇستىك كورەيادان سول ەسەپپەن جەڭىلىپ قالدى. ءوز توبىندا ەكىنشى ورىن العان قازاقستاندىقتار وسىلايشا جارتىلاي فينالعا شىققان بولاتىن.

جارتىلاي فينالدا قازاقستان قۇراماسى تايلاندتان جالپى ەسەپتە 1:3 ەسەبىمەن جەڭىلىپ، فينالعا تايلاندتىقتار جولداما الدى.

قازاقستان قىزدارى 2008-جىلى وليمپيادا ويىندارىنا قاتىسىپ، وندا جالپى كوماندالىق ەسەپتە توعىزىنشى ورىن العان ەدى.

ازيا قۇرلىعىنان ىرىكتەۋ كەزەڭى ارقىلى وليمپياداعا ءبىر جولداما بەرىلەدى. بۇگىن فينالدا وڭتۇستىك كورەيا مەن تايلاند قۇرامالارى باسەكەگە تۇسەدى.

ءدۇبىرلى دودادا بارلىعى 12 قۇرام باق سىنايدى. بۇگىنگى كۇنگە دەيىن وليمپيادادا سىنعا تۇسۋگە جاپونيا، سەربيا، قىتاي، ا ق ش، برازيليا، رەسەي، يتاليا، كەنيا، ارگەنتينا قۇرامالارى جولداما الدى. ولاردىڭ قاتارىنا بۇگىن ەۋروپا، ازيا جانە سولتۇستىك امەريكادا ىرىكتەۋ كەزەڭىنەن جەڭىمپاز اتانعان قۇرامالار قوسىلادى.