08:41, 13 - قاڭتار 2020 | GMT +6
حالىقارالىق وليمپيادا كوميتەتى توكيو وليمپياداسىندا ساياسي يشارالارعا تىيىم سالدى
نۇر-سۇلتان. قازاقپارات - حالىقارالىق وليمپيادا كوميتەتى 2020-جىلعى توكيو وليمپياداسى كەزىندە ساياسي يشاراتتار جاساۋعا تىيىم سالىناتىنىن مالىمدەدى، دەپ حابارلايدى قازاقپارات Huffington Post باسىلىمىنا سىلتەمە جاساپ.
«جاھاندىق دەڭگەيدە بەيتاراپتىلىق ساقتاۋ كەرەك. ەشبىر ساياسي، ءدىني نەمەسە ەتنيكالىق بەلگىلەرگە جول بەرىلمەۋى ءتيىس» دەلىنگەن كوميتەتتىڭ حابارلاماسىندا.
كوميتەتتىڭ حابارلاۋىنشا، وليمپيادانىڭ اشىلۋ جانە جابىلۋ سالتاناتتارىندا، ويىن الاڭدارىندا، ماراپاتتاۋ شاراسىندا جانە باسقا دا رەسمي جيىنداردا قانداي دا ءبىر يشاراتتار كورسەتۋگە تىيىم سالىنادى.
كوميتەت سپورتشىلار ءوزىنىڭ جەكە پىكىرىن بىلدىرۋگە بولاتىن ورىندار ارنايى بەلگىلەنەتىنىن جانە الەۋمەتتىك جەلىلەردى پايدالانۋعا بولاتىنىن مالىمدەدى.
ايتا كەتۋ كەرەك، وليمپيادا تاريحىندا سپورتشىلاردىڭ قانداي دا ءبىر ساياسي وقيعالارعا نارازىلىق ءبىلدىرۋ جاعدايى بىرنەشە رەت بولعان.