ۋكراينا ۇشاق اپاتىنا يران اشىق تەرگەۋ جۇرگىزەدى دەپ كۇتۋدە - ۋكراينا پرەزيدەنتى

كيەۆ. ۋكرينفورم- قازاقپارات - ۋكراينا ۇشاق اپاتىنا بايلانىستى يران تاراپى تولىق ءارى اشىق تەرگەۋ امالدارىن جۇرگىزىپ، كىنالىلەر جاۋاپكەرشىلىككە تارتىلادى كۇتىپ وتىر.

بۇل تۋرالى ۋكراينا پرەزيدەنتى ۆلاديمير زەلەنسكي Facebook-تە ءمالىم ەتتى، دەپ حابارلايدى «قازاقپارات» ح ا ا ۋكرينفورمعا سىلتەمە جاساي وتىرىپ.

«بۇگىنگى كۇننىڭ تاڭەرتەڭى بىزگە جايلى بولعان جوق، الايدا اقيقاتتان حاباردار بولدىق. حالىقارالىق كوميسسيانىڭ جۇمىسى اياقتالعانعا دەيىن، يران جاعى ۋكراينالىق ۇشاق اپاتىنا قاتىستى ءوزىنىڭ كىناسىن مويىندادى. دەگەنمەن دە كىنانى تولىقتاي مويىنداۋدى تالاپ ەتەمىز. وسى ورايدا يراننان تولىق ءارى اشىق تەرگەۋ امالدارىن جۇرگىزۋگە، كىنالىلەردى جاۋاپكەرشىلىككە تارتۋعا، قازا بولعانداردىڭ ءمايىتىن قايتارۋعا، وتەماقى تولەۋگە، ديپلوماتيالىق ارنالار بويىنشا رەسمي كەشىرىم سۇراۋعا دايىن ەكەندىكتەرىن راستايدى دەپ كۇتەمىز»، - دەپ اتاپ ءوتتى پرەزيدەنت.

سونىمەن قاتار ول الداعى ۋاقىتتا تەرگەۋ شارالارى جاساندى كىدىرۋ مەن كەدەرگىلەرسىز اتقارىلاتىنىنا ءۇمىت ارتتى.

«ءادىل باعا بەرۋ ءۇشىن ءبىزدىڭ 45 مامانعا بارلىق مالىمەتتەر قولجەتىمدى بولۋى ءتيىس جانە ءوزارا ءىس-قيمىل شارالارىمەن قامتىلۋى كەرەك»، - دەپ ناقتىلادى زەلەنسكي.

ەسكە سالساق ، يران قارۋلى كۇشتەرى باس شتابىنىڭ حابارلاۋىنشا، تەگەران ماڭىندا سارسەنبى كۇنى قۇلاعان ۇشاقتى يراننىڭ اۋە قورعانىس كۇشتەرى قىزمەتى زىمىرانمەن بايقاۋسىزدا اتىپ تۇسىرگەن.

يران پرەزيدەنتى ۋكراينا ۇشاعىنىڭ قۇلاۋىنا كىنالىلەر قىلمىستىق جاۋاپقا تارتىلاتىنىن ءمالىم ەتتى.

وسىعان دەيىن يراندا 180 جولاۋشىسى بار ۋكراينا ۇشاعى قۇلاعانى تۋرالى حابارلاندى.

ءوز كەزەگىندە كانادا پرەمەر-ءمينيسترى يران جولاۋشىلار لاينەرىن ابايسىزدا اتىپ جىبەرۋ مۇمكىن دەگەن بولجامىن جاريالاعان بولاتىن.

اۆتور: رۋسلان عابباسوۆ