قىرعىز- تاجىك شەكاراسىنداعى اتىس توقتادى
باتكەن وبلىسىندا ورنالاسقان شەكارا بولىمشەلەرى كۇشەيتىلگەن رەجيمدە قىزمەت اتقارۋدا. قىرعىز- تاجىك مەملەكەتتىك شەكاراسىنداعى وتكىزۋ بەكەتتەرى شتاتتىق رەجيمدە جۇمىس ىستەپ جاتىر.
تاجىكستان مەن قىرعىز رەسپۋبليكالارىنىڭ قۇقىق قورعاۋ ورگاندارىنىڭ بىرلەسكەن تەرگەۋ توبى قاقتىعىستىڭ سەبەپتەرى مەن ءمان-جايدى انىقتاۋ ماقساتىندا تەرگەۋ جۇرگىزبەك.
قىرعىزستاننىڭ «كابار» اگەنتتىگىنىڭ حابارلاۋىنشا، باتكەن وبلىسىنداعى مەملەكەتتىك شەكارانىڭ قىرعىز- تاجىك ۋچاسكەسىندەگى كۇش قۇرىلىمدارى بولىمشەلەرىنىڭ ءىس - قيمىلدارىن باس شتاب باستىعى- قىرعىز رەسپۋبليكاسىنىڭ مەملەكەتتىك شەكارا قىزمەتى ءتوراعاسىنىڭ ءبىرىنشى ورىنباسارى پولكوۆنيك ابدىكارىم الىمبايەۆ ۇيلەستىرەدى.
قىرعىز رەسپۋبليكاسىنىڭ مەملەكەتىك شەكارا قىزمەتىنىڭ مالىمەتىنشە، قاڭتاردىڭ 9 ىنان 10 ىنا قاراعان ءتۇنى ساعات 00:40 تا باتكەن وبلىسى باتكەن اۋدانى جاقا-ورۋك جەرىندە بەلگىسىز بىرەۋلەر باتكەنگە بارا جاتقان قىرعىزستان ازاماتىنا تيەسىلى كولىككە تاس لاقتىرعان. ولار تاجىكستان اۋماعىندا جاسىرىنعان. قىرعىز رەسپۋبليكاسىنىڭ قۇقىق قورعاۋ ورگاندارىنىڭ اقپاراتى بويىنشا، كولىكتە بولعان قىرعىزستاننىڭ ازاماتتارى زارداپ شەككەن.
شامامەن ءبىر ساعاتتان كەيىن تاجىكستاننىڭ كوچو-كارىن ەلدى مەكەنىندەگى ازاماتتار باتكەننەن كوك-تاش اۋىلىنا بارا جاتقان قىرعىزستاننىڭ باسقا ازاماتىنىڭ كولىگىنە تاس لاقتىرعان. شامامەن 2 ساعات 40 مينۋتتا تاجىكستان ازاماتتارى داحما جەرىندە قىرعىزستان ازاماتىنىڭ ۇيىنە تاس لاقتىرعان. شەكاراشىلار قۇقىق قورعاۋ ورگاندارىنىڭ وكىلدەرىمەن بىرلەسىپ قىرعىزستان ازاماتىنىڭ ۇيىنە بارا جاتقاندا ولارعا تاجىكستان تاراپىنان ۇساق كاليبرلى اڭشى مىلتىعىنان وق اتىلعان.
تاجىكستاننىڭ ۇ ق ك شەكارا اسكەرلەرىنىڭ باسپا ءسوز ورتالىعىنا سىلتەمە جاساعان «حوۆار» تاجىك اقپارات اگەنتتىگىنىڭ حابارلاۋىنشا، 2020 -جىلى 9-قاڭتاردا كەشكە باتكەن اۋدانى اقساي اۋىلدىق كەڭەسىنىڭ كوكتوش اۋىلى تۇرعىندارىنىڭ ۇلكەن توبى اڭشى قارۋىمەن قارۋلانىپ، قىرعىزستان ازاماتى ابدۋلايەۆ سۇلتانبەك يسمايل ۇلىنىڭ ءۇيىنىڭ ماڭىندا جينالىپ، يسفارا قالاسى چوركۋح اۋىلدىق كەڭەسىنىڭ سومونيەن اۋىلىنىڭ جولىندا تاجىك ازاماتتارىنىڭ ءجۇرىپ وتۋىنە كەدەرگى كەلتىرگەن.