تۇركىستاندا بالاسىن بايلاپ تاستاعان اناعا قاتىستى قىلمىستىق ءىس قوزعالدى
الەۋمەتتىك جەلىدە ءبىر جاستان اسقان ءبۇلدىرشىن بولمەنىڭ ورتاسىندا بايلاۋلى وتىرعان ۆيدەو تاراپ جاتىر. كورىنىستەن ايەل ادامداردىڭ ۇرىس-كەرىسىن، «بالانى بۇلايشا قورلاۋعا بولا ما؟» دەگەن سوزدەردى ەستۋگە بولادى. ۆيدەونى بالانى كورۋگە كەلگەن اكەسى تۇسىرگەن.
بەلگىلى بولعانداي، ەرلى-زايىپتىلار اجىراسىپ كەتكەن سوڭ، بالا اناسىمەن قالعان. ال، بالاسىن كورۋگە كەلگەن اكەسى بۇرىنعى ايەلى ءبۇلدىرشىننىڭ اۋزىن تۇمشالاپ، ءتىپتى قيمىل- قوزعالىسىن شەكتەپ تاستاعانىن كورەدى.
وقيعاعا بايلانىستى بۇگىن تۇركىستان وبلىستىق پوليتسيا دەپارتامەنتى رەسمي اقپارات تاراتتى. ءتارتىپ ساقشىلارىنىڭ سوزىنشە، بۇل جاعداي سارىاعاش اۋدانىندا بولعان. قازىر تەرگەۋ امالدارى جۇرگىزىلۋدە.
«بۇل جايت بيىلعى 8-قاڭتاردا سارىاعاش اۋداندىق پوليتسيا بولىمىندە سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە تىركەلدى. ارىزدا جەرگىلىكتى تۇرعىن بۇرىنعى ازاماتتىق نەكەدەگى ايەلى 2017 -جىلى تۋعان ۇلىنا قىسىم كورسەتكەنىنە شاعىمدانعان. سونداي-اق، سارىاعاش ا پ ب قىزمەتكەرلەرى ق ر ق ك-نىڭ 140-بابى «كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ» بويىنشا ءىس قوزعادى. تەرگەپ-تەكسەرۋ بارىسىندا وقيعانىڭ تولىق ءمان-جايى مەن كىنالى تاراپ انىقتالاتىن بولادى. قازىرگى تاڭدا سوتقا دەيىنگى تەرگەۋ امالدارى جالعاسۋدا»، - دەلىنگەن حابارلامادا.
اۆتور: اينۇر اقبايەۆا