قازاقستاننىڭ ءتورت قالاسىنا مينسكتەن ۇشاق قاتىنايتىن بولدى
نۇر-سۇلتان. قازاقپارات - اقتاۋ، قاراعاندى، پاۆلودار، قوستاناي قالاسىنا بەلارۋستىق «بەلاۆيا» اۋە كومپانياسىنىڭ رەيستەرى اشىلادى، دەپ حابارلايدى قازاقپارات ق ر يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.
باسپا ءسوز قىزمەتى تاراتقان اقپاراتتارعا قاراعاندا، مەملەكەت باسشىسىنىڭ تاپسىرماسى اياسىندا جاڭا حالىقارالىق باعىتتار اشۋ بويىنشا قر ييدم ازاماتتىق اۆياتسيا كوميتەتى جۇيەلى جۇمىس جۇرگىزۋدە. سونىمەن، كوميتەت پەن بەلارۋس رەسپۋبليكاسىنىڭ اۆياتسيالىق بيلىك ورىندارى اراسىنداعى قول جەتكىزىلگەن كەلىسىمدەرگە سايكەس 2019 -جىلى جەلتوقساندا اكابا (يوردانيا) قالاسىندا (ICAN 2019) اۋە قاتىناستارى تۋرالى كەلىسسوزدەر جۇرگىزۋ بويىنشا وتكەن حالىقارالىق ازاماتتىق اۆياتسيا ۇيىمىنىڭ (يكاو) جىل سايىنعى كەزەكتى كونفەرەنتسياسىندا «بەلاۆيا» اۋە كومپانياسى قازاقستاننىڭ قالالارىندا ءبىرقاتار رەيستەر اشادى.
اۋە كومپانياسىندا 2020 -جىلدىڭ جازعى ۋاقىتىندا ۇشاتىن مينسك- اقتاۋ، مينسك- قاراعاندى، مينسك- پاۆلودار جانە مينسك- قوستاناي رەيستەرىنە بيلەت ساتۋ باستالدى.
قازىرگى ۋاقىتتا «بەلاۆيا» اۋە كومپانياسى نۇر-سۇلتان جانە الماتى قالالارىنا جىل بويى ۇشاتىن رەيستەردى جۇزەگە اسىرۋدا.
سونداي-اق، بيىلعى جىلدىڭ شىلدە ايىنان باستاپ مينسك- الماتى باعىتىنداعى رەيستەر كۇن سايىن ۇشاتىن بولادى.